Akuzat për spiunazh tronditin Iranin, regjimi i Teheranit ekzekuton dhe arreston në masë agjentë të Mossad

Ndërkohë, të hënën u krye edhe një tjetër ekzekutim.

Një burrë, i cili “rrëfeu” gjatë torturave — u ekzekutua nga regjimi iranian, dhe ky nuk është i pari. Rasti i tij i shtohet, sipas një raporti të Economic Times, një numri të paspecifikuar rastesh të ngjashme, ku të gjithë të pandehurit — për të cilët nuk dihet ende numri — “rrëfyen” se kishin bashkëpunuar me Mossadin izraelit.

Depërtimi i shërbimit sekret famëkeq izraelit në zemër të Iranit teokratik, prej vitesh, dhe operacionet mbresëlënëse që ka kryer, kanë krijuar panik dhe frikë të madhe në radhët e inteligjencës iraniane. Agjentët e këtij shërbimi shohin agjentë të Mossadit kudo dhe, gjatë 24 orëve të fundit, janë përfshirë në një gjueti shtrigash në stilin e Inkuizicionit mesjetar.

Po arrestohen njerëz që dyshohet se kanë bashkëpunuar me Izraelin, pa dallim, duke i gjykuar dhe ekzekutuar menjëherë. Kjo është një përpjekje për të dhënë përshtypjen se po bëjnë një “punë të efektshme”. Ekzekutimet nuk kryhen publikisht për shkak të gjendjes së luftës, ndonëse regjimi i Teheranit do të donte shumë që ato të shërbenin si mjet frikësimi ndaj popullatës.

Gjithashtu, mbetet e paqartë nëse personat e ekzekutuar kanë pasur ndonjë lidhje reale me Mossadin, apo thjesht kanë qenë në vendin e gabuar, në kohën e gabuar.

Paranoja që mbizotëron rreth “agjentëve të padukshëm të Institutit” — siç e quajnë Mossadin — ka çuar Shërbimin e Inteligjencës iranian të lëshojë udhëzime të veçanta për qytetarët. Sipas këtyre udhëzimeve, si të dyshuar klasifikohen individë që mbajnë syze dielli apo maska, mbajnë çanta të mëdha, drejtojnë kamionë ose makina bujqësore, apo shihen duke filmuar instalime ushtarake, bërthamore ose zona industriale.

Depërtimi i thellë i Mossadit në Iran

Ajo që nuk është kuptuar plotësisht nga autoritetet iraniane është fakti që Mossadi ka arritur të depërtojë thellë në Iran për shumë vite, duke ngritur një rrjet të sofistikuar agjentësh. Këta agjentë janë organizuar në skuadra të posaçme, secila me mision specifik, nga vrasës dhe operatorë dronësh, te ekipe mbikëqyrjeje dhe rekrutues vendas.

Pikërisht rekrutuesit dyshohet se kanë tërhequr një numër të madh disidentësh iranianë, të cilët kanë ndihmuar Mossadin në disa prej operacioneve më të guximshme — përfshirë edhe atentatin ndaj drejtuesit të programit bërthamor iranian, Mohsen Fakhrizadeh.

Sipas zyrtarëve dhe analistëve perëndimorë që janë të familjarizuar me çështjet e inteligjencës, vendimi për të realizuar këtë operacion ishte marrë një vit para se të ekzekutohej. Gjatë gjithë kësaj kohe, Fakhrizadeh ishte vendosur nën mbikëqyrje të vazhdueshme, me ndihmën e rekrutëve iranianë. Lëvizjet e tij ishin të njohura për Mossadin: rutina ditore, zakonët, numri i truprojave dhe rrugët që përdorte për të shkuar në punë apo në shtëpinë e tij verore.

Operacioni përfundimtar u ekzekutua nga Kidon — skuadra e padukshme e goditjes së Mossadit — me një saktësi që konsiderohet një tjetër kulm operativ në historinë e këtij shërbimi.

Operacioni i fshehtë dhe i sofistikuar

Një investigim i gjerë i Wall Street Journal ka zbuluar detaje të panjohura për këtë operacion të Mossadit, të zhvilluar përpara sulmit ndaj Iranit. Gazeta thekson se ishte një mision disavjeçar që përfshinte kontrabandimin e qindra dronëve të pajisur me eksplozivë në Iran, përmes kanaleve tregtare.

Njëkohësisht, Mossadi kishte pozicionuar agjentë të trajnuar pranë objekteve të mbrojtjes ajrore dhe pikave të lëshimit të raketave, duke neutralizuar dhjetëra prej tyre në momentin e nisjes së sulmit izraelit. Kjo bëri që avionët F-35 të mos hasin rezistencë të konsiderueshme gjatë goditjeve ndaj objekteve bërthamore iraniane.

Një tjetër fakt i rëndësishëm është se 70 luftëtarë izraelitë operuan për më shumë se dy orë brenda territorit iranian, duke shkaktuar një kaos të planifikuar dhe duke shpërfaqur kapacitetet mbresëlënëse të shërbimit izraelit.

Top Channel