Kosova voton për herë të dytë brenda vitit 2025. Presidentja Vjosa Osmani caktoi këtë të hënë 12 tetorin për mbajtjen e zgjedhjeve lokale.
“Ky vendim është marrë pas shqyrtimit të kujdesshëm të propozimeve të subjekteve politike, si dhe pas një analize të plotë, në përputhje me afatet kushtetuese dhe ligjore”, u tha në njoftimin e Presidencës së Kosovës.
Caktimi i kësaj date, sipas Presidencës, synon që të mundësojë përgatitje të plotë të procesit zgjedhor nga institucionet përgjegjëse, përfshirë Komisionin Qendror të Zgjedhjeve (KQZ) dhe institucionet e tjera, me qëllim respektimin e standardeve të larta të administrimit zgjedhor.
Osmani iu bëri thirrje subjekteve politike, organizatave dhe shoqërisë civile që të garantojnë një proces zgjedhor gjithëpërfshirës, të rregullt dhe të drejtë.
Zgjedhjet e fundit lokale u mbajtën në tetor të vitit 2021, ku Lidhja Demokratike e Kosovës fitoi në shumicën e komunave, ndjekur nga Lëvizja Vetëvendosje dhe Partia Demokratike e Kosovës.
Caktimi i datës për zgjedhjet lokale vjen në kohën kur Kosova është përfshirë në një krizë politike pas zgjedhjeve parlamentare të shkurtit.
Që nga votimet, ende nuk janë krijuar institucionet e reja, pasi deputetët nuk kanë arritur ta konstituojnë Kuvendin e Kosovës, që do t’i hapte rrugë edhe krijimit të ekzekutivit të ri.
Top Channel
