“Nuk do e vrasim, tani për tani”/ Pas komenteve të Trump, udhëheqësi suprem i Iranit lëshon paralajmërim për Izraelin: Beteja fillon! 18/06 08:50
Rusia ka pretenduar të dielën se ka hyrë për herë të parë në rajonin qendror të Ukrainës, Dnipropetrovsk, në një zhvillim që mund të përkeqësojë situatën për forcat ukrainase, të cilat tashmë janë të shtrira në disa fronte të luftës.
Sipas Ministrisë së Mbrojtjes Ruse, nënnjësitë e Divizionit të 90-të të tankeve kanë arritur në kufirin midis rajoneve të Donetskut dhe Dnipropetrovskut dhe më pas kanë hyrë në territorin e këtij të fundit. Moska e ka pasur në objektiv këtë zonë prej muajsh, duke e parë si një hap të rëndësishëm drejt zgjerimit të kontrollit të saj në Ukrainën lindore dhe qendrore.
Megjithatë, raportet nga fusha e betejës nuk mund të verifikohen në mënyrë të pavarur. Autoritetet ukrainase nuk kanë konfirmuar përparimin e forcave ruse në Dnipropetrovsk, dhe situata në terren mbetet e paqartë.
Nëse përparimi konfirmohet, ai do të shtonte presionin mbi forcat e Kievit, të cilat tashmë përballen me sulme të vazhdueshme në disa drejtime – përfshirë edhe në rajonin verior të Sumy-t dhe zonën strategjike të Lyman në Donetsk.
Në veçanti, qyteti i Pokrovskut, një pikë kyçe logjistike dhe ushtarake në Donetsk, mbetet në shënjestër të sulmeve të rënda. Shtabi i Përgjithshëm i Ukrainës njoftoi se gjatë 24 orëve të fundit, trupat e tij kishin ndaluar 65 sulme ruse në drejtim të Pokrovskut.
Sipas një vlerësimi të Institutit për Studimin e Luftës (ISW), forcat ruse kanë intensifikuar përpjekjet ofensive në këtë drejtim, megjithatë pa shënuar ndonjë përparim të konsiderueshëm gjatë ditës së shtunë.
Rajoni i Dnipropetrovskut kufizohet nga tre zona që janë pjesërisht nën kontrollin e forcave ruse: Donetsku, Zaporizhzhia dhe Khersoni. Pushtimi i këtyre rajoneve është një nga objektivat e shpallura të Kremlinit, ndërsa Rusia ka tashmë kontroll të plotë mbi pjesën më të madhe të tyre, përveç një zone të vogël në Luhansk.
Dnipropetrovsk është më pak i populluar se rajonet e tjera lindore, por ka rëndësi të madhe strategjike për shkak të industrisë së tij minerare dhe pozicionit si qendër logjistike. Para luftës, ai kishte një popullsi prej rreth tre milionë banorësh.
Pretendimi për përparim në Dnipropetrovsk vjen vetëm disa ditë pasi trupat ruse raportuan avancime të mëtejshme në rajonin verior të Sumy-t. Kjo ka sjellë kryeqytetin e këtij rajoni – gjithashtu të quajtur Sumy – brenda rrezes së sulmeve me dronë dhe artileri.
Edhe pse pushtimi i qytetit të Sumy-t nuk shihet si një objektiv i afërt për Moskën, ky zhvillim e shton ndjeshëm presionin mbi mbrojtjen ukrainase, që tani ndodhet nën trysni të vazhdueshme nga veriu në jug.
Në sfondin e këtyre përparimeve dhe një procesi paqeje të bllokuar, situata në Ukrainë mbetet gjithnjë e më e pasigurt.
Top Channel
