Mbretëresha Camilla e dashuruar me Molly, prezanton anëtaren më të re të familjes

Në një moment të ndjerë, Mbretëresha 77-vjeçare ndau një fotografi zyrtare ku Molly qëndron me besim në prehrin e saj. Qenushja u adoptua nga Shtëpia e Qenve dhe Maceve “Battersea”, një organizatë bamirëse me të cilën Camilla ka një lidhje të gjatë dhe të përzemërt.

E njohur për dashurinë e saj të veçantë për racën Jack Russell Terrier, Mbretëresha Camilla ka pasur edhe më parë dy qen të shpëtuar nga Battersea — Beth dhe Bluebell — të cilat madje janë përjetësuar në fustanin e saj të kurorëzimit përmes qëndisjeve të detajuara.

Lamtumira prekëse për Beth

Kjo qeneshe vjen pas një kapitulli të vështirë për Mbretëreshën, që humbi Beth-in në nëntor 2024. Pallati i Buckinghamit lëshoi një deklaratë prekëse duke e përshkruar Beth-in si një “shoqe shumë të dashur” që i solli asaj “kaq shumë gëzim”.

“Një lamtumirë e trishtuar për Beth, shoqen e dashur të Mbretëreshës, e cila solli kaq shumë gëzim — qoftë në shëtitje, duke ndihmuar në detyrat zyrtare apo e mbështjellë pranë zjarrit,” thuhej në deklaratë.

Camilla e adoptoi Beth-in në gusht të vitit 2011, kur ajo ishte vetëm 12 javëshe, pasi u dashurua me një foto të saj që iu dërgua me email nga stafi i Battersea. Më vonë, në vitin 2016, ajo u bë edhe patrone zyrtare e organizatës.

Në një intervistë për gazetën Mail në atë kohë, ajo shprehej: “Nuk munda t’i rezistoja. Ajo është e bukur. Është kaq emocionuese. Mezi pres që ai (qeni) të takojë familjen.”

Molly, kafsha e re mbretërore

Fotografia zyrtare e publikuar së fundmi shënon daljen e parë publike të Mbretëreshës Camilla me Molly-n, por qenushja simpatike u vu re edhe në një imazh të mëparshëm përpara vizitës së saj në Shfaqjen e Luleve në Chelsea, duke qëndruar mbi një karrige druri me një jakë të kuqe dhe blu.

Molly lindi më 26 dhjetor. Nëna e saj është një Jack Russell gjysmë-racë, ndërsa raca e babait mbetet e panjohur. Ajo pritet të jetojë në Rat Hill, rezidencën private të Mbretëreshës Camilla në Wiltshire, por gjithashtu do të shoqërojë çiftin mbretëror në rezidencat zyrtare.

Lajmi për ardhjen e Molly-t ka ngjallur entuziazëm tek fansat e familjes mbretërore. Lidhja e Camilla-s me kafshët e saj ka qenë gjithmonë e dukshme: ajo i ka përfshirë në veshjet zyrtare, i ka shfaqur në intervista dhe nuk është ndarë kurrë nga to në momentet më të rëndësishme publike.

Ashtu si Mbretëresha e ndjerë Elizabeth II me dashurinë e saj për qentë korgi, edhe Camilla duket se po vijon traditën mbretërore të dashurisë për kafshët, këtë herë me një kapitull të ri përkrah Molly-t.

Top Channel