“Vij tek ju si një vëlla që dëshiron të jetë shërbëtor i besimit dhe gëzimit tuaj”, Papa Leo XIV bën thirrje për unitet dhe dënon propagandën fetare 18/05 11:59
Të paktën dy persona u vranë dhe më shumë se një duzinë të tjerë u plagosën kur një anije stërvitore e Marinës Meksikane, që transportonte 277 pasagjerë, u përplas me pjesën e poshtme të Urës së Bruklinit në Nju Jork, të shtunën në mbrëmje, sipas autoriteteve.
“Në këtë moment, nga 277 personat në bord, 19 kanë pësuar lëndime, 2 prej të cilëve ndodhen në gjendje kritike, ndërsa 2 të tjerë fatkeqësisht kanë ndërruar jetë si pasojë e plagëve,” shkroi kryebashkiaku i Nju Jorkut, Eric Adams, në platformën X.
Dy viktimat raportohet se kanë rënë nga një prej direkëve të anijes, tha një zyrtar i zbatimit të ligjit për CNN. Ata u shpallën të vdekur pasi u dërguan në një spital aty pranë. Sipas të njëjtit zyrtar, anija është zhvendosur më pas në Skelën 36 të Nju Jorkut.
Sipas shefit të Departamentit të Policisë së Nju Jorkut, Wilson Aramboles, anija duket se humbi fuqinë rreth orës 20:20, teksa kapiteni po përpiqej ta manovronte, çka bëri që ajo të drejtohej drejt një prej shtyllave të urës dhe direku të godiste pjesën e poshtme të saj.
Zyrtarët paralajmëruan se informacionet janë paraprake dhe mund të ndryshojnë. Bordi Kombëtar i Sigurisë së Transportit po kryen një hetim mbi ngjarjen.
Pamjet filmike tregojnë momentin kur direku i anijes Cuauhtémoc godet pjesën e poshtme të urës dhe thyhet, me pjesë që bien mbi kuvertën e anijes. Nuk ka dëmtime të dukshme në strukturën e urës, e cila u rihap për trafik në mbrëmje, pasi ishte mbyllur për një kohë të shkurtër.
Sipas Aramboles, disa marinarë që ndodheshin në direk gjatë përplasjes janë lënduar.
Në një postim në spanjisht në X, Marina Meksikane deklaroi se 22 persona janë plagosur, ndërsa 19 prej tyre kanë marrë kujdes mjekësor në spitalet lokale.
“Statusi i personelit dhe pajisjeve është nën shqyrtim nga autoritetet detare dhe lokale, të cilat po ofrojnë mbështetje,” thuhet në deklaratën e Marinës Meksikane.
Zhytës të Departamentit të Zjarrfikësve të Nju Jorkut janë përgatitur për t’u zhytur në lumin East pas përplasjes.
Sipas kapitenit Juan Caballero, zëdhënës i Marinës Meksikane, anija ndodhej në një udhëtim stërvitor që zhvillohet çdo vit.
Të gjitha korsitë e Urës së Bruklinit u mbyllën përkohësisht në të dy drejtimet pas incidentit, por u rihapën rreth orës 22:30, sipas zyrtarëve të emergjencës në Nju Jork.
“Ndonëse inspektimet do të vazhdojnë, nuk ka shenja të dëmtimit strukturor në Urën e Bruklinit në këtë fazë,” deklaroi Fabien Levy, zëdhënës i kryebashkiakut Adams.
Policia e Nju Jorkut u kërkoi qytetarëve të shmangin zonën e Urës së Bruklinit, Portit Detar South Street në Manhattan dhe zonën Dumbo në Brooklyn, për shkak të trafikut të rënduar dhe pranisë së shumtë të mjeteve të emergjencës.
Kjo është një histori në zhvillim dhe do të përditësohet.
Mark Morales dhe Hanna Park nga CNN kontribuan në këtë raport.
Top Channel
