“Dua të bëj marrëveshje me Iranin”, Trump paralajmëron: Nëse vazhdon të sulmojë fqinjët, do detyrohem të… 13/05 19:14
Dita e parë e gjyqit të Sean “Diddy” Combs ka përfunduar në Nju Jork. Manjati dhe biznesmeni 55-vjeçar i hip-hopit po përballet me akuza për shantazh dhe trafikim seksual dhe, nëse dënohet, rrezikon burgim të përjetshëm.
Dëshmia e ish-partneres së Diddy-t, Cassie Ventura, pritet të luajë një rol vendimtar në këtë çështje. Kriminologu Joey Jackson shpjegon se Cassie është “çelësi” për t’i ndihmuar jurinë të kuptojë kontekstin e akuzave, pasi pritet që ajo të përshkruajë në detaje elementet “seks, drogë dhe pushtet”.
Aktakuza përqendrohet në atë që prokurorët e përshkruajnë si “sulme të çmendura”, të cilat dyshohet se ishin “performanca seksuale të përpunuara dhe të inskenuara”, ku gratë janë detyruar ose ndjerë nën presion të marrin pjesë bashkë me punëtorë meshkuj të seksit.
Në aktakuzë, prokurorët citojnë gjithashtu video nga kamerat e sigurisë të një hoteli në Los Anxhelos, që duket se tregon Combs duke sulmuar Cassie Ventura në vitin 2016. Ventura, e cila pritet të dëshmojë, ishte një nga disa personazhe të famshëm për të cilët u pyetën anëtarët e mundshëm të jurisë gjatë procesit të përzgjedhjes së tyre.
Prokurorët pretendojnë se Combs përdori dhunë dhe kërcënoi karrierën muzikore të Venturës për ta detyruar atë të kryente akte seksuale pa pëlqimin e saj dhe poshtëruese me prostituta meshkuj, gjatë të ashtuquajturave “seksuale të çmendura” që Combs i ka filmuar.
Videoja dhe dëshmia nga roja e sigurisë së hotelit
Ish-roja e sigurisë së hotelit, Israel Florez, dëshmitari i parë i thirrur, i tha gjykatës se kishte bërë disa video me celularin e tij pasi ndërhyri në incidentin e vitit 2016 midis Combs dhe të dashurës së tij të atëhershme, Cassie Ventura. Ai tregoi se i kishte bërë videot sepse nuk mendonte se gruaja e tij do ta besonte ndryshe.
Në një video ai duket duke i bërë shenjë Cassie Venturës të hyjë në një dhomë, ndërsa në një tjetër ai diskuton incidentin me mbikëqyrësin e tij. Florez tha se nuk thirri policinë sepse Cassie donte vetëm të largohej dhe askush nuk donte të ngrejë padi.
Ai tregoi para jurisë se atë mëngjes, më 5 mars 2016, në hotelin InterContinental në Los Anxhelos, kishte marrë një telefonatë për një “grua në vështirësi” në katin e gjashtë. Kur arriti atje, gjeti Combs të mbështjellë me një peshqir, të ulur në një karrige me një shprehje “djallëzore” në fytyrë dhe një vazo të thyer në dysheme. Zonja Ventura ishte fshehur në një cep me fytyrën e mbuluar dhe përsëriste se donte të largohej, ndërsa Combs i tha se nuk mundej.
Florez dëshmoi se znj. Ventura kishte një sy të skuqur, por nuk donte të telefononte policinë dhe përfundimisht u largua me një SUV të zi.
Punonjësi i seksit
Dëshmitari i dytë ishte Daniel Phillip, një ish-eskortë, i cili dëshmoi se kishte pasur marrëdhënie seksuale me Cassie Ventura në disa raste, në praninë e Sean Combs. Ai pretendoi në gjykatë se kaloi deri në 10 orë me Combs dhe Venturën.
Phillip tha se Combs i ofroi drogë, por ai nuk e përdori atë. Ai përshkroi një rast ku Ventura dukej se ishte nën ndikimin e drogës.
Ai rrëfeu se herën e parë kur i takoi ishte ditëlindja e znj. Ventura dhe se Combs donte të bënte “diçka të veçantë”. Në dhomën e errët të hotelit, Combs kishte veshur një rrobë të bardhë, një kapelë bejsbolli dhe një shami që mbulonte pjesërisht fytyrën. Megjithatë, Phillip e njohu zërin e tij.
Kur e pyeti se me çfarë merrej, Combs u përgjigj se merrej me “biznes import-eksport”. Në dhomë kishte shishe me vaj dhe lubrifikant për foshnje. Phillip tregoi se ai dhe Ventura kishin kryer marrëdhënie seksuale dhe ishin fërkuar me vaj për foshnje, ndërsa Combs masturbohej. Ai nuk kujton që reperi të ketë thënë ndonjë fjalë dhe se më pas iu paguan “disa mijëra dollarë më shumë”.
Phillip tha se pati takime të ngjashme me çiftin disa herë, që zgjatën nga një deri në dhjetë orë. Në dy raste ai dëgjoi ose pa Combs të ishte i dhunshëm ndaj Cassie-s. Ai tha se nuk ndërhyri sepse Combs ishte “i fuqishëm” dhe kishte frikë për jetën e tij.
Dëshmia e tij do të vazhdojë të martën. Gjyqi pritet të zgjasë rreth tetë javë.
“Me të meta, por jo shantazhist apo trafikant seksual”
Avokatët mbrojtës të Combs argumentuan se të gjitha marrëdhëniet seksuale kanë qenë konsensuale dhe se çështja nuk ka të bëjë me asgjë tjetër përveçse me preferencat seksuale të klientit të tyre, të cilat, sipas tyre, duhet të mbeten private. Ata këmbëngulin se Combs është një “individ me të meta”, por jo një shantazhist apo trafikant seksual.
Gjatë përzgjedhjes së jurisë, 150 kandidatëve të mundshëm iu kërkua të plotësonin një pyetësor që shqyrtonte njohuritë e tyre për Combs, pikëpamjet mbi zbatimin e ligjit, dhe nëse kishin përjetuar ndonjë formë sulmi seksual. Atyre iu dha gjithashtu një listë me të paktën 190 personazhe të famshëm dhe figura publike, dhe u kërkua të shënonin cilët njihnin.
Ndër figurat publike në listë ishin Kanye West, Michael B. Jordan, Mike Myers dhe Kid Cudi – megjithëse kjo nuk do të thotë domosdoshmërisht se ata do të dëshmojnë.
Top Channel
