Një ekip shkencëtarësh ka identifikuar zona në tru që aktivizohen kur një person bëhet i vetëdijshëm për veten dhe mendimet e tij.
Ky proces enigmatik duket se kontrollohet nga “talamusi”, një rajon qendror i trurit i njohur tashmë për funksionin e tij si një “filtër” midis sinjaleve ndijore dhe korteksit cerebral.
Perceptimi i vetëdijshëm është aftësia e njerëzve për të perceptuar stimujt e marrë nga shqisat e tyre. Është një gjendje e ndryshme nga thjesht të qenit zgjuar, ku ndjesitë përpunohen automatikisht. Gjithashtu, perceptimi i vetëdijshëm kërkon një analizë të detajuar dhe vullnetare të stimujve të jashtëm. Për shembull, ne mund të marrim frymë automatikisht, por gjithashtu mund të jemi të vetëdijshëm për frymëmarrjen tonë dhe të modifikojmë ritmin e saj. Në mënyrë të ngjashme, kur dëgjojmë një këngë, mund t’i kushtojmë vëmendje dhe të dallojmë instrumentet muzikore që e përbëjnë atë.
Kohët e fundit, neurologët kanë filluar të kërkojnë pjesën e trurit ku ndodh ky ndryshim në perceptim. Studiuesit tradicionalisht kanë dyshuar se një funksion i tillë duhet të kontrollohet nga korteksi cerebral, sepse aty ndodh përpunimi i avancuar i informacionit në tru. “Talamusi” nuk është përjashtuar kurrë nga pjesëmarrja në perceptimin e vetëdijshëm, megjithatë zakonisht i është caktuar një rol dytësor si një “filtër” që përgatit informacionin shqisor për korteksin. Një studim i ri i botuar së fundmi në Science e ripërcakton këtë pikëpamje, duke e vendosur “talamusin” si një pjesëmarrës aktiv në perceptimin e vetëdijshëm.
Top Channel
