Von der Leyen bën thirrje nga Britania për rritje të bashkëpunimit: Më shumë investime në energji të pastër në Detin e Veriut 24/04 18:50
Marrëdhëniet midis Indisë dhe Pakistanit janë përkeqësuar ndjeshëm pas sulmit militant dy ditë më parë në Kashmirin Indian që vrau 26 civilë, me të dyja vendet që dëbuan diplomatët, pezulluan vizat e udhëtimit, mbyllën kufijtë dhe shkëmbyen paralajmërime.
Të paktën tre persona të armatosur, sipas policisë indiane, hapën zjarr ndaj turistëve në qytetin Pahalgam, në ultësirën e Himalajeve, të martën, duke vrarë 25 indianë dhe një nepalez. Policia indiane ka publikuar emrat e tre militantëve të dyshuar për sulmin, duke thënë se dy janë pakistanezë, por Nju Delhi nuk ka dhënë prova për akuzën e tij apo detaje të mëtejshme.
India fillimisht fajësoi për sulmin – më vdekjeprurësin kundër civilëve që nga viti 2000 në këtë rajon indian me shumicë myslimane – islamistët e mbështetur nga Pakistani . Pakistani mohon çdo përgjegjësi për sulmin dhe ka mbledhur sot Komitetin e Sigurisë Kombëtare.
Nju Delhi njoftoi se kishte urdhëruar të gjithë shtetasit pakistanezë në Indi, përveç diplomatëve, të largoheshin nga vendi deri më 29 prill. “Të gjithë shtetasit pakistanezë aktualisht në Indi duhet të largohen nga India përpara skadimit të vizave të tyre”, të cilat do të skadojnë më 27 prill për viza të rregullta dhe 29 prill për viza mjekësore, tha Ministria e Punëve të Jashtme indiane.
Ministria gjithashtu informoi shtetasit indianë në Pakistan që të kthehen sa më shpejt të jetë e mundur.
Kjo u parapri nga deklaratat e profilit të lartë nga kryeministri indian Narendra Modi, i cili u zotua se autoritetet do të gjurmonin autorët e sulmit vdekjeprurës.
Islamabadi, pasi u mblodh Komiteti i Sigurisë Kombëtare, u përgjigj duke njoftuar se po mbyllte kufijtë me Indinë dhe hapësirën e saj ajrore për linjat ajrore indiane, ndërsa deklaroi disa diplomatë indianë persona non grata dhe anuloi vizat e shtetasve indianë.
Dje, qeveria nacionaliste hindu në Nju Delhi kishte nisur tashmë një seri hakmarrjesh diplomatike. Ndër këto vendime, të cilat kryesisht kanë rëndësi simbolike, janë pezullimi i traktatit strategjik me Islamabadin në lidhje me burimet ujore të pellgut të lumit Indus, mbyllja e postës kryesore kufitare me Pakistanin dhe tërheqja e diplomatëve.
Duke reaguar, Islamabad tha sot se Pakistani do të ndërmarrë “veprim të vendosur” kundër çdo “kërcënimi indian”, duke argumentuar se çdo përpjekje e fqinjit të tij për të reduktuar furnizimin me ujë nga lumi Indus do të konsiderohej një “akt lufte”.
Top Channel
