“Po përdorim TikTok-un me VPN”/ Rama i përgjigjet komentuesve në rrjete sociale: Turp i madh, kujdes se…

Një nga komentuesit deklaroi se po përdor VPN për të lundruar në TikTok, pas mbylljes së rrjetit social.

Rama deklaroi se përdorimi i VPN-së është i rrezikshëm, pasi mund të ndikojë në cënimin e të dhënave personale.

“Përdorimi i Tik Tok me VPN një turp i madh. Duhet shumë kujdes sepse është i hapur për marrjen në kohë reale të të dhënave. Është njësoj si ta përdorësh duke ndarë me të tjerët paswordin apo të dhënat. Por çështja këtu nuk është çështje Hitlerit, por është çështja Tik Tik në mënyrën si shërbehet në Shqipëri është shumë i rrezikshëm”, u përgjigj ai.

Përgjigjet e plota të Ramës:

“Është shumë e vështirë të diskutosh me Ramën – thotë Majku, “Sy m’sy’’ – se nuk e di kush janë këto persona që debatojnë me Ramën.  Unë po përpiqem po është e pamundur si qytetar i thjeshtë që jam, ndoshta është akses vetëm patronazhistët”

O miku im, nuk është akses vetëm për patronazhistët se patronazhistët nuk kanë nevojë të hyjnë këtu e të debatojnë me mua, se patronazhistët me mua debatojnë natën, kur ti je duke fjetur, kështu që ti mos ki asnjë merak në këtë aspekt, po ki parasysh që janë 1000, 2000 pyetje, komente, kështu që e kam të pamundur që t’i përgjigjem të gjithave dhe që madje t’i shoh që të gjitha, a më kupton? Kështu që ne zgjedhim me stafin ato që stafi konsideron më polemike. Ja, në këtë rast ti je zgjedhur dhe ja ku më ke.

 “Si të dua të kuptoj që Rama i vjedh qytetarët me VKM”.

Kryeministri Edi Rama: Ah, tani këtu, fillon hyn në zonën e gabuar, aty ku është kënetë edhe ku të zhytet këmba, pastaj trupi, edhe pastaj këneta të merr dhe mendjen dhe fillon e flet gjëra pa kuptim.

“Deri sa të mbarojnë dhe 200 video, nuk është  nevoja me hedh video, gjasme se ti ke rregulluar rrugët se i ke copë-copë, se i shohim përditë ca gjendje janë dhe ti me thua kategoria A”.

S’e marr vesh fare për ça e ke fjalën, por nëse e ke fjalën për rrugën Tiranë- Durrës ajo është një superstradë dhe do bëhet një autostradë e kategorisë A, po ashtu do bëhet. Nuk e di për ça e ke fjalën, po di që kjo është e vërtetë. Pastaj kuptohet që je i ndikuar, edhe ajo edhe puna jote. Mendoj që përtej këtyre ndikimeve, fokusohu sepse ne datën 11, maj nuk është çështja se a të pëlqejnë videot e mia a s’të pëlqejnë videot e mia, madje as fare s’është çështja a të pëlqej unë a s’të pëlqej unë. Çështja është a do ta marrësh ti pasaportën evropiane apo nuk do marrësh. Ti personalisht, do ta marrësh pasaportën evropiane të Shqipërisë dhe pasaporta evropiane  e Shqipërisë e merr vetëm nëse Shqipëria futet në BE dhe Shqipërinë në BE e fus vetëm unë dhe PS, nuk e fut njeri tjetër dhe ky është interes, nuk është çështja të pëlqej a s’të pëlqej.

Interesi yt është që të kesh pasaportën europiane për të gjitha ato arsye që kam shpjeguar, duke filluar që nga ai korridori në aeroport, që mos të të ndajnë veç e të mos të thonë “dil një çikë këtej se je shqiptar’’ e pastaj të shkosh te polici e të të thotë polici “po ku po shkon, po sa lekë ke me vete, po hotelin e ke të rezervuar? Po sa do rrish? Po kur do ikësh?” Që aty! Të hysh në BE nga ai korridori ku hyjnë të gjithë evropianët, thjesht duke treguar pasaportën ashtu, duhet të kesh një pasaportë që ka të njëjtën vlerë si në vendet e tjera. Je në Francë, ka të njëjtën vlerë si pasaporta franceze për çdo gjë. Vetëm një gjë nuk bën dot në Francë ti me pasaportën shqiptare të BE; nuk zgjidhesh dot në parlamentin kombëtar. Aty do të të duhet nënshtetësi franceze, vetëm kaq. Kuptove? Kështu që lëri këto, jo videot, jo gjasme, jo ça rrugësh janë, fokusohu tek BE. Fokusohu tek pasaporta jote, mendoj unë.

“Po vdesim për bukë, ke hyrë në gjynah të madh. Shumë keq”

 Kush po vdes për bukë, mo vlla? Xhimi thotë po vdesin për bukë populli i thjeshtë. Po kush po vdes për bukë? Xhimi, asnjë shqiptar s’ka vdekur për bukë që nga koha e Skënderbeut që ta dish, për 1001 arsye që s’është vendi këtu t’i shpjegoj, po për bukë asnjë shqiptar s’ka vdekur. Këtu nuk është çështje të vdesin për bukë apo të rrojmë me një copë bukë, këtu çështja është e ngritjes së mëtejshme të standardeve, jam shumë dakord, po kjo të vdesim për bukë, mos e përsërisni më dhe është shumë interesant se këto profilet që flasin për bukë, janë të mbushura me gjellë, fotografi me gjellë, me mish, me birra, me barqe të mëdha. Nuk e kuptoj ça është kjo histori.

“Atëherë po përdorim Tik Tokun me VPN- thotë ky. Ok. Çeltina Morina, “meqë doje të bëje Hitlerin ti”.

Turp i madh përdorimi i këtyre lloj emrave, megjithatë nuk ka problem. Secili mban përgjegjësinë e vet për ato që thotë ndërkohë VPN përdore po bëj shumë kujdes sepse kur përdoret me VPN, është i hapur për marrjen në kohë reale të të dhënave. Kjo dihet botërisht, është njësoj si ta përdorësh duke e ndarë me të tjerët passëordin, duke e ndarë me të tjerët gjithë të dhënat dhe nëse nuk ke ndonjë problem me këtë punë, përdore. Dakord? Por çështja këtu nuk është çështje e “Hitlerit”, domethënë emra që s’e di fare ça peshe kanë; çështja këtu është çështja që TikTok në këtë gjendje siç është dhe kështu siç shërbehet  në Shqipëri, është shumë i rrezikshëm. Shumë, shumë i rrezikshëm. Kjo është çështja.

“Mirëmëngjesi, Kryeministër Edi. Sokoli. Kur do të bëhet Shqipëria të kthehem të punoj në Shqipëri”?

Faleminderit. Në Shqipëri që tani. Nuk e di ku je dhe ku punon dhe me çfarë merresh, por në Shqipëri mund të kthehesh dhe të punosh që tani dhe të jesh i sigurtë që llogaria në fund nëse do punosh natyrisht dhe me siguri duke qenë në emigracion, ke aftësi, ke eksperiencë, ke dhunti. Ti ke bërë aftësi të posaçme për punë në atë punë që je profilizuar, po punove këtu ka kërkesë të madhe për njerëz të kualifikuar kështu që hajde dhe do të dalë më mirë në fund të muajit, sipas meje.

“Alternativa jote  12 vite, Kryeministër cila është, më votoni mua se ka rrjedh Sala? Ore e di ti që i ke institucionet sheshit, a ke mendu me e zgjidh? Mbushur me injorantë të nivelit somalianë. Të thuash, i fyen somalianët”

Në fakt nuk fyhen somalianët fare, ti  Ledio, fyen veten tënde në këtë lloj gjuhe dhe nëse do ishte kështu, të paktën minimalisht ne nuk do ishim fare gjëkundi në tryezën e BE për të hyrë në BE dhe që ta dish ti, BE ka jo një, jo dy, jo tre, jo katër, po dhjetëra e dhjetëra persona që merren pikërisht me këto tema dhe një nga temat është monitorimi i administratës, i funksionimit të administratës që do të thotë se po të jetë se do të ishte diçka të vërtetë nga kjo që thua, ne nuk do ishim sot vendi me kalendarin e miratuar bashkërisht me Komisionin Evropian për t’i mbyllur negociatat brenda 2027 dhe për t’u bërë anëtarë të BE dhe nëse shikon raportet e bëra nga ekspertët e BE për funksionimin e administratës, do shikosh që Shqipëria është në vendin e parë në rajon. Klasifikimi. Në rajon. Tani ti thua “shikoni institucionet e shtetit të zë koka me mëndu”.

Po pse duhet të shkosh ti te institucionet e shtetit për shembull. Ti ke platformën e-Albania, të gjitha shërbimet 95% përveç atyre të pasaportës kur duhet të lesh gjurmët e gishtave, apo kur do të martohesh, etj etj. Po një grup i vogël shërbimesh janë ende pa akses të plotë në e-Albania. Pse duhet të shkosh ti në institucionet e shtetit? Ça do të zgjidhësh ti në institucionet e shtetit që nuk ta zgjidh platforma e-Albania për shembull? Pyetje.

Dhe alternativa ime cila është, alternativa ime është më e qartë se kurrë, më e kthjellët se kurrë, më e dukshme se kurrë. “Shqipëria në Bashkimin Europian” – Keni ndonjë gjë kundër kësaj. Dhe gjithë kjo rrugë ka qenë një rrugë e mundimshme patjetër, po për ta sjell punën këtu. Jemi një hap larg! Një hap, është konkrete, është reale, është aktuale. Prandaj lëri këto përralla me mbret dhe fokusohu te Shqipëria në Bashkimin Europian. Shqipëria në Bashkimin Europian është e gjitha, në rast dhe kur ne të futemi në Bashkimin Europian, ne do të kemi shumë gjëra plus nga ato që kemi sot. Në nivelin personal ti do të kesh pasaportë europiane, një pasaportë që ty do të bëjë qytetar europian të barabartë me të gjithë qytetarët e Bashkimit Europian në çdo drejtim. Që nga liria jo vetëm për të lëvizur, po për të hyrë në çdo vend të Bashkimit Europian pa të nxjerrë te ajo radha tjetër që të thonë: – Dil içik këtej dhe pa kaluar te polici që të bën intervista: Ku je? Kush je? Nga vjen? Ku shkon? Sa ditë do të rrish? Etj, etj. Tek të gjitha të drejtat e tjera, duke filluar nga e drejta e qëndrimit aty për çfarë do qoftë që ty të intereson, e kthimit lirisht këtu, e mobilitetit tënd edhe si një forcë pune. Tani kjo është personale.

Kolektivja është shumë evidente. Nëse Shqipëria hyn në Bashkimin Europain dhe në momentin që hyn në Bashkimin Europian ne kemi një buxhet ekstra dhe me atë buxhet mund të bëjmë shumë më shumë gjëra të tjera. Përveç faktit që në momentin kur hyjmë në Bashkimin Europain ne kemi të garantuar një herë 3 mirë faktit që askush më nuk na kërcënon barazinë para ligjit dhe nuk kërcënon kthimin përmbys të gjithë kësaj përpjekje të madhe që janë bërë për reformën e drejtësisë.

Tani çfarë do të them? Të të them që dil nga ai territor ku je ngujuar dhe shikoje realitetin pak më ndryshe se sa ç’e shikon, okej.

Edhe unë nuk them votoni mua se ka rrjedh bufi i kënetës. Se që është në rrjedhje është në rrjedhje, kjo duket qartë, po kjo është çështje e moshës, kjo është çështje e atyre që vazhdojnë e lënë rrugëve të bëhet meme përditë, por unë them votoni për mua, sepse vetëm unë dhe Partia Socialiste, e bëjmë këtë hap të fundit për të kyçur Shqipërinë në Bashkimin Europian, nuk e bën dot askush tjetër. Kjo është shumë e thjeshtë, shumë e qartë dhe i ka të gjitha argumentet. Pra nuk e bën dot askush tjetër, cilido tjetër, minimalisht do të shkaktonte një shtyrje dhe një vonesë, që pastaj mund të sillte mbylljen e asaj dere. Ajo derë është hapur, jo thjesht për arsyen tonë, por dhe për arsyen e tyre.

Por në historinë e zgjerimit të Bashkimit Europian, ajo derë kështu ka shkuar, është hapur, pastaj është mbyllur, është rihapur dhe është rimbyllur. Tani është hapur, do ta lëmë të mbyllet në këto broçkulla. Unë mendoj jo! Mendoj duhet të fokusohemi përtej të gjitha atyre që mund të kemi në raport me njërin, në raport me tjetrin, përtej të gjithave. Nuk mund të më thuash ti mua që administrata shqiptare është somaleze, s’mund të ma thuash dot këtë dhe nuk mund të ma thuash dot për arsyen e thjeshtë se sot ta thashë 95 % e shërbimeve ti i merr nga xhepi, i merr nga telefoni që ke në xhep me saktë, jo nga xhepi se nuk paguan asgjë. Dhe 620 milion euro u janë kursyer shqiptarëve nga pikërisht kalimi në shërbimet online. Ky është auditi ndërkombëtar që ne i kemi bërë platformës, 620 milion euro i janë kursyer shqiptarëve. 33 milion euro i janë kursyer vetëm atyre që kanë marrë shërbime nga jashtë vendit. Deri dje duhet të vinin këtu për t’i marrë ato shërbime dhe për certifikatë duhet të vinin këtu, sot i marrin nga andej nga Australia shërbimet në platformë. Ka probleme, patjetër që ka probleme, nuk diskutohet, por ama ku e ku me ç’ishte dhe një hap larg Bashkimit Europain, vetëm një hap. Kuptove!

“Si nuk del një politikan dhe të thotë do rrisim pensionet 300 euro në muaj, po vetëm propagandë. Akoma nuk kemi ujë 24 orë, vetëm 2 orë në ditë dhe ai pa presion”.

Nuk e di ku banon, mund të gjendesh mbase në ndonjë zonë ku ka vetëm dy orë ujë një ditë dhe ai pa presion, sepse ka ende zona të tilla, por po të informoj që kur ne morëm detyrën, kishte vetëm katër zona urbane në Shqipëri në 24 orë ujë, sot ka 43 zona urbane dhe 98 zona rurale. Dhe në ndërkohë janë 11 kantiere të hapura aktualisht që flasim. dhe kur flas për këto zona, flas për zonat 24 orë ujë. Dhe në ndërkohë, i gjithë projekti përmbyllet në mandatin e katërt, ku ka financime dhe projekte. Disa janë në kantiere, disa të tjerë, 5 të tjera praktikisht do të hapen në kantiere, pra 16 kantiere mungojnë për ta përmbyllur këtë proces, që të jemi të qartë bashkë. Ndërkohë që përsa i përket pensioneve 300 euro, këtë mirë që nuk e thotë njeri se kjo është një, kjo do të ishte pastaj një katastrofë e paralajmëruar. Për arsyen e thjeshtë se kam shpenguar disa herë, pensionet nuk janë çështje, dëshire. Nuk ekziston kryeministër në planet, edhe ai më i poshtri, që mos dojë të rrisë pensionet e rrogat sa ç’kanë qejf njerëzit, apo rroga, apo? Por dallimi është se ai që është i përgjegjshëm në raport edhe me fëmijët, jo vetëm me të rriturit, nuk bën gjëra të cilat nesër i paguajnë fëmijët. Nuk ndërton piramida që pastaj zënë brenda gjithë vendin, siç e zunë ‘97 dhe prandaj tek pensionet që bazohen tek Fondi i Sigurimeve, pensionet bazohen tek Fondi i Sigurimeve, pra paguajnë të gjithë për pensionin dhe ndërkohë me ato që paguajnë, paguhen pensionet aktualisht. Kuptove, kështu që ne synojmë që deri në 2030, të mund të arrijmë tek pensioni minimal 200 euro, deri në 2030. Ndërkohë që për ata që janë me siguri të plota të kemi një pension mesatar 400 euro, por kjo është rruga. E rruga tjetër, ajo që flet ti, është rrugë e katastrofës dhe këtë ne nuk e bëjmë dot, dakord. Dhe në ndërkohë kemi thënë dhe përsëris që pensionistët po marrin bonuse domethënëse në raport me të shkuarën dhe do vazhdojnë të marrin bonuset, në ndërkohë që ne gradualisht do të çojmë pensionin deri në atë minimalen që sa po thashë.

“Para se të prisni shiritin në ceremoni, ai kolaudon kush ato rrugë.” Po patjetër që kolaudon, nuk diskutohet që kolaudon. “Apo i shikoni në 3D dhe iu duken kategoria A”. Për çfarë e ke fjalën tani? “Ah, jam kurioz ta di kur kaloj rrugën e Thumanës..”

Në qoftë se ke vërejtje për rrugën e Thumanës, nuk të ndihmojnë dot, i dashur, nuk të ndihmojmë dot. Në qoftë rruga e Thumanës ty nuk të duket si kategoria A, atëherë nuk të ndihmon dot më vjen shumë keq.

 “Kështu kërkon votën, tipik njeri dembel që gjithmonë i harron hallet e veta, apo të popullit që drejton dhe merresh me budallenj, se di si ekzistojnë njerëz që ju mbështesin”.

Epo ja që ekzistojnë dhe ekzistojnë shumicë njerëzish dhe po të siguroj që ajo shumica ka gjithmonë të drejtë, ta dish. Pastaj kjo pjesa e dembelit, mua më kanë thënë çdo gjë, të gjitha mi kanë thanë, por këtë dembel s’ma ka thënë njeri të them të drejtën.

Madje dhe Luli thotë që unë rri pa gjumë se bëj punë të liga, por vetëm dembel s’ma ka thënë njeri, kështu që nuk e di ku e gjete këtë, por s’ka problem. Paske dhe pseudonim AL Durrës 2202 edhe duhet të jesh nga këta të kënetës. Në Durrës humbje të madhe do marrë këneta këtë herë.

“Premtove për linjë direkt NY – Tiranë. A do realizohet këtë vit?

Është duke u bërë procesi me aviacionin federal të Shteteve të Bashkuara dhe me aeroportin e Tiranës, por është një proces që kërkon kohën e vet kështu që kjo nuk varet nga ne. Unë nuk kam premtuar ta bëjmë brenda 2025, unë kam premtuar që do të fillojmë dhe do bëjmë procesin dhe e kemi filluar procesin, por a do të realizohet që të ulet avioni i parë brenda 2025 apo nuk do realizohet kjo është një gjë që do ta shohim në proces. Unë shpresoj deri nga fundi i vitit, por është diçka që do ta shohim në proces.

“Po ku ka ujë 24 orë o zoti kryeministër”

Më fal, ti që flet ke shkuar në të gjitha zonat e Shqipërisë dhe ke hapur rubinetin. Ujë 24 orë ka në 43 zona urbane dhe në 98 zona rurale të Shqipërisë.

Dje në sy më sy-in e vogël ju përgjigja dikujt nga Durrësi dhe i shpjegova se ku ka në Durrës, në cilat zona të Durrësit ka ujë 24 orë. Ka dhe në pjesën më të madhe të Shqipërisë ka ujë 24 orë, do ti apo s’do ti. Duan apo s’duan ata që s’duan. Ka pjesë të tjera, ku akoma s’ka ujë 24 orë dhe për këtë po punohet, por edhe një herë tjetër, në pjesën më të madhe të Shqipërisë ka ujë 24 orë, ky është fakt. Si ta them, që nuk ka? Ka!

“Po legalizimet ku i premtove? Asgjë nuk bëhet falas, vetëm lekë duan. Këto janë tani muhabete pa lidhje.”

Ne kemi bërë 270 mijë legalizime. Janë dhe rreth 60 mijë që kanë mbetur, vazhdojnë. Janë dhe ato që kanë vështirësi të natyrës ligjore, ndërkohë që janë bërë 270 mijë legalizime, mbi çerek milioni dhe çdo me thënë ku i bërë? Ja pra i bëra! Siç i premtuam i bëmë dhe po i bëjmë dhe duam ta përmbyllim këtë proces brenda mandatit të katërt sepse janë numra shumë të mëdhenj dhe nuk bëhen si komentet këtu që bën një koment dhe kthehesh nga ana tjetër dhe ia fut gjumit

“O Rame, duhet rrugë jo pasaportë. Nuk kemi shtëpi në Bruksel, por i kemi në katundet e Librazhdit o Rame!”

Që të shpjegoj dhe një herë tjetër, e para rrugët që kemi bërë edhe në zonën e Librazhdit janë shumë. Patjetër që ka ende rrugë për të bërë, nuk diskutohet kjo, por që të bëjmë më shumë rrugë na duhet ajo pasaporta që ta dish ti. Si lidhet tani ajo pasaporta me rrugët? Ajo pasaporta buron nga të qenit anëtar i BE. Në momentin që ne bëhemi anëtar të BE marrim një buxhet ekstra.

Pra, nëse deri më sot në gjithë këto vite ne nga BE kemi marrë 1 miliardë e ca, 90% kredi, 10 % grante, në momentin që ne bëhemi anëtarë, ne marrim 1 miliardë e ca në vit, 90% grant, 10% kredi.

A e kupton çfarë të flas, a e kupton pse të them mos u merr me “O Ramë, o Rame”, se me atë merret Luli, eshte copyright-i i Lulit. Mos i merr dhe atë copyright që ka se atë ka, laj thaj “Rame”, nuk ka gjë tjetër Luli shkretë, tani lëre Lulin. Fokusohu këtu, mos u merr fare “të pëlqen, s’të pëlqen Rama”, “të pëlqen s’të pëlqen PS”.

Rama dhe PS janë sot në kohën e duhur dhe në vendin e duhur që të hapin rrugën ty dhe të gjithë shqiptarëve, duke të dhënë pasaportën në dorë dhe t’i japin Shqipërisë një buxhet ekstra duke e futur në BE, a e kuptove? Fokusohu këtu që po të them. Këtu fokusohu, ke kohë të merresh me Ramën e me PS sa të duash por fokusohu këtu një here.

Është patriotike kjo që po të them, duhet ta shohim njeri-tjetrin në sy si shqiptar jo të rrimë t’i gjejmë qimen në sy tjetrit dhe të mos shohim traun në syrin tonë kur thotë ajo shprehja, por duhet ta shohim njeri-tjetrin në sy si shqiptar. Duhet të kuptojmë që si shqiptar duhet të lidhemi bashkë të gjithë dhe të fusim shqipen në BE, duke filluar që nga domosdoshmëria për sigurinë.  Sot, popujt e BE e mbështesin më shumë se asnjë tjetër BE për  të cilin hidhnin vickla deri ca kohë më parë sepse kuptojnë që është perimetër sigurie, siguri në kuptimin e drejtpërdrejtë të fjalës. Pastaj për barazinë para ligjit dhe pastaj për mirëqenien, për rritjen e mirëqenies.

BE është bekim për vende si yni, që në momentin që hyjnë janë vende përfitues quhen. Kontribuuesit janë të mëdhenjtë si një familje, të vegjlit janë përfituesit në BE dhe një miliardë e kusur euro në vit janë shumë për ne, janë shumë për ne dhe duhet t’i marrim një orë e më parë. Kuptove apo s’kuptove? Kuptoje pra, kuptoje!

“Zoti kryeministër rroga minimale duhet të ishte 600 në fund të këtij mandati”.

Se kemi thënë kurrë këtë gjë. Rroga minimale nuk vendoset kështu se kështu do, asnjë rrogë, asnjë pension nuk vendoset se duam ne, por vendoset bazuar te llogaritë sepse nuk është diçka që jep sot dhe heq nesër. Po e dhe një herë duhet ta japësh gjithmonë dhe duhet të bësh projeksion të qartë që duhet t’i kesh ato para gjithmonë. Paga minimale në qershor do të vendoset që të bëhet 500 euro dhe do hyjë në fuqi në 1 janar të vitit tjetër sepse paga minimale nuk është kaq e thjeshtë sa duket sepse do t’ia imponosh kompanive. Kompanitë kanë mundësitë apo pamundësitë e tyre. Nga ana tjetër paga minimale ndikon në fuqinë konkurruese etj. Kështu që, nuk është kaq e thjeshtë. Imponohet, ti thuaj kaq, thuaj aq, por nuk e bëjnë dot pastaj. Si i bëhet?

Koment lidhur me kapitujt për negociatat

E di ti që ka ndryshuar metodologjia i dashur. E di këtë? E para. E dyta e punës, mos më dëgjo mua, a i dëgjon ti çfarë thonë përfaqësuesit më të lartë të Be. A e dëgjove çfarë tha Komisionerja për zgjerimin për Shqipërinë në BE brenda 2030 dhe duam të mbyllim negociatat deri në 2027. Po çfarë janë këto muhabete, sa kapituj janë mbyllur? Po sa kohë kanë ata. Dhe po të them që nuk ka lidhje kjo, është muhabet pa lidhje kur i thonë fjalës sepse këtu janë përputhur dëshirat, janë përputhur qëllimet, janë përputhur yjet e fatit për herë të parë qysh nga ’90. Ata jo vetëm thonë “ju duam në BE”, por thonë “ju duam tani në BE”. A e kuptove? Kështu që duhet të fokusohemi këtu, lerë sa kapituj ka mbyllur Serbia, Mali i Zi se këto s’janë muhabete kafenesh. Mali i Zi ka filluar përpara sesa ne të vinim në qeveri, negociatat. Ne i kemi filluar vjet dhe sot jemi dy vendet pararojë, front runners që i quan BE për të hyrë në BE, kuptove? Çfarë muhabetesh janë këto?

“Zoti kryeministër, a ka korrupsion në Shqipëri dhe çfarë do bëni?”

Siç e shihni, korrupsioni në Shqipëri po luftohet më shumë seç është luftuar kurrë ndonjëherë tjetër, për herë të parë në historinë e Shqipërisë po ndodh që njerëz të lidhur me pushtetin politik thirren  nga prokurorë dhe gjykatës të pavarur nga pushteti politik, për herë të parë, dhe kush thotë që kjo nuk ka lidhje me mua dhe Partinë Socialiste nuk thotë të vërtetën. Jemi pikërisht unë dhe Partia Socialiste që e kemi sjellë këtë risi historike në jetën shqiptare, që nga 1912 kur është ngritur flamuri i pavarësisë dhe kur është krijuar qeveria e parë dhe deri para pak vitesh në Shqipëri kurrë një person i lidhur me pushtetin politik nuk është hetuar dhe gjykuar nga një drejtësi e pavarur; janë pushkatuar, po, ministra edhe janë varur në litar, por me urdhër nga kjo zyrë këtu. Këtu në këtë zyrë gjendej shpata, shpata që duhet të rrijë gjithmonë në dorën e zonjës së drejtësisë.

E kishte pushteti politik, ne e dorëzuam shpatën, kështu që ky është kulmi i vullnetit për të luftuar korrupsionin. Kush thotë diçka tjetër dhe flet ndryshe, flet gabim, këtë di të them unë.

“Zoti Kryeministër, aman, ai ishte programi se nuk mora vesh asgjë për zotin”?

Për çfarë programi e ke fjalën? Çfarë do të marrësh vesh që nuk e more vesh Kreshnik?”

O zotëri, ne jemi në qeveri, ne kemi programin qeverisës të stërdetajuar në çdo fushë, ne jemi në negociata me Bashkimin Europian. Si mendon ti, Bashkimi Europian bën negociata me një vend që nuk ka program? Çfarë muhabetesh janë këto? Mos dëgjoni bufin e kënetës, largohuni nga këneta, ikni nga këneta, braktisni kënetën. Këtë di t’ju them unë, nuk po them ikni nga këneta e bëhuni anëtarë të Partisë Socialiste, nuk po jua kërkon njeri këtë gjë por ikni nga këneta për shëndetin tuaj mendor dhe për shëndetin e arsyes suaj, ikni nga këneta. Kush rri në kënetë rrjedh, lajthit, letohet thotë populli i Tironës.

“Po nuk na shpjegove pak historinë e bufit, të sjell fat?”

Për kë e ke fjalën, për këtë këtu? Po ky më sjell fat, por duhet të dish që e kam shpjeguar këtë gjë, shihe e kërkoje, bufi i kënetës. E ke dëgjuar? Po kur del aty e bën si buf kënete, ç’më rri akoma aty si buf kënete, mos më rri si buf kënete, mu largo o buf kënete. Kjo është historia e bufit.

Nuk po i referohem mesazheve që janë me fjalë të mira.

“O Ramë, pse e ofendon bufin?”

Ti thua pse ofendoj bufin vërtetë? Shikoni këtu, unë nuk ofendoj askënd, thjesht unë ju vë përpara panoramën me një metaforë, e kam bërë dhe herë të tjera, e bëj dhe përsëri, unë nuk jam fare lloji i politikanit apo përfaqësuesit publik që shaj të tjerët “O kriminel, o hajdut, o maskara, o drogaxhi, o kështu e ashtu”. Këto janë maskarllëqe që çuditërisht një pjese të madhe nuk i bën përshtypje kurse kur unë flas në mënyrë metaforike ose kur flas në mënyrë simbolike, ofendoj.

Unë nuk ofendoj askënd, unë po them realitetin, jemi përballë një kënetë që u mbretëron një buf kënete, ky është realiteti dhe për të kuptuar se çfarë kënete është ajo, të cilën do duhet ta gjykoni edhe në 11 maj dhe shpresoj të kontribuoni për ta tharë, mjafton të shihni listat e mbyllura. Ato lista të mbyllura janë kënetë, aty është këneta në listat e mbyllura të koalicionit madhështor të Kujtim Gjuzit, aty është këneta, në listat e mbyllura. Shikoni listat e mbyllura dhe aty keni kënetën, të gjithë Kuak-Kuak.

Besoj që mund ta mbyllim, jemi në kohë për ta mbyllur dhe patjetër që do të kemi përsëri e përsëri Sy më Sy.

Janë shumë nga këto pozitivet kështu që nuk dua të merrem me to sepse pastaj thonë “Po ti merresh vetëm me patronazhistët” jua thashë që patronazhistët nuk kanë detyrë dhe kohë sepse po të futeshin patronazhistët këtu do përmbytej fare faqja ime, do shkonte në një pafundësi komentesh dhe likesh, por patronazhistët nuk merren me këtë fare, patronazhistët kanë detyrë tjetër.

Ju falenderoj shumë për bashkëbisedimin, për vëmendjen dhe paçi një ditë të mbarë dhe një javë të mbetur shumë të mbarë.

Top Channel