Osmani kërkon mbrojtje nga Londra, takohet me Lammy: Propozon marrëveshje “speciale”
02/04 12:28
Sindikata e Policisë së Kosovës ka reaguar për vrasjen e policit Muhamed Lika në shkallët pranë banesës së tij.
Ata kanë dënuar aktin e rëndë, duke e konsideruar atentat të drejtpërdrejtë ndaj sigurisë publike.
“Sindikata e Policisë së Kosovës dënon atentatin kriminal që i mori jetën kolegut tonë, Rreshter Muhamed Lika. Ky akt i rëndë është një atentat i drejtpërdrejtë ndaj sigurisë publike, ligjit dhe vetë shtetit të Kosovës. Çdo sulm ndaj një zyrtari policor është sulm ndaj Republikës së Kosovës!
Policia e Kosovës është shtylla kryesore e rendit dhe sigurisë në vend. Prekja e saj është përpjekje për të minuar themelet e shtetit tonë dhe nuk do të tolerohet. Sindikata e Policisë së Kosovës kërkon nga të gjithë akterët shtetërorë dhe institucionet e drejtësisë veprime të menjëhershme për zbardhjen e këtij akti kriminal dhe vënien para përgjegjësisë të autorëve.
Ne qëndrojmë të palëkundur në mbështetje të çdo pjesëtari të Policisë së Kosovës dhe nuk do të lejojmë që këto akte të frikësimit të lëkundin përkushtimin tonë ndaj detyrës dhe Republikës. Nder dhe lavdi për sakrificën e Rreshter Muhamed Lika!”, thuhet në reagimin e tyre.
Ndërkohë për krimin ka reaguar edhe Ramush Haradinaj, i cili i ka shprehu ngushëllime familjes.
“Thellësisht i prekur nga lajmi për vrasjen në rrethana të paqarta të pjesëtarit të Policisë së Kosovës, Muhamed Lika, pranë shtëpisë së tij në Kaçanik.
I ndjeri ishte një atdhetar i dëshmuar, i cili qysh si i ri iu bashkua radhëve të UÇK-së për çlirimin e vendit dhe më pas, në liri, i shërbeu me përkushtim Kosovës nën uniformën e Policisë. Jeta dhe vepra e tij janë shembull i përkushtimit ndaj atdheut dhe mbrojtjes së qytetarëve.
Ngushëllimet më të sinqerta familjes Lika, kolegëve të tij në Policinë e Kosovës dhe të gjithë atyre që e njohën. Kërkoj nga institucionet zbardhjen e menjëhershme të këtij rasti dhe sjelljen e autorëve para drejtësisë!”, shkruan Haradinaj.
Po ashtu reagim ka pasur edhe nga kryetari i Kuvendit të Kosovës, Glauk Konjufca:
“Shumë i pikëlluar për vrasjen e rreshterit policor Muhamed Lika në Kaçanik. Kjo është një ngjarje e rëndë dhe tejet pikëlluese, ku u qëllua për vdekje një zyrtar policor i Kosovës, i cili deri dje ishte në shërbim të mbrojtjes së rendit dhe sigurisë së qytetarëve.
Bëj thirrje për hetime sa më të plota e të shpejta që është e mundur, në mënyrë që autori apo autorët e këtij krimi të vendosen përballë drejtësisë. Ngushëllimet më të sinqerta për familjen, miqtë dhe kolegët e rreshterit Muhamed Lika, të cilët duhet të gjejnë forcën për ta përballuar këtë humbje të madhe!”
Top Channel
