Vrasja e policit në derën e shtëpisë, reagon sindikata e Policisë së Kosovës: Atentat i drejtpërdrejtë ndaj sigurisë publike 02/04 11:03
E qartë në kërkesat e saj, presidentja e Kosovës i propozoi sekretarit të Jashtëm të Mbretërisë së Bashkuar, David Lammy, arritjen e një marrëveshjeje mes dy vendeve, e cila në focus të ketë mbrojtjen dhe ekonominë.
Lammy po qëndron për vizitë zyrtare në Kosovë, në kuadër të një turneu në Ballkanin Perëndimor, që, sipas Qeverisë së Mbretërisë së Bashkuar, ka për qëllim kyç forcimin e bashkëpunimit në luftimin e emigracionit të parregullt dhe krimit të rëndë të organizuar.
Në konferencën e përbashkët për shtyp me kryediplomatin britanik, presidentja pohoi se biseda e tyre ishte përqëndruar tek “thellimi i bashkëpunimit strategjik” mes Prishtinës dhe Londrës.
Osmani: Autoritetet e Kosovës janë të përkushtuara për të punuar me ato britanike në mënyrë që t`i jepët formë marrëveshjes dhe ajo të nënshkruhet sa më parë. Ne po kështu bëjmë thirrje për një prani edhe më aktive të Mbretërisë së Bashkuar në Kosovë.
Lammy nga ana e tij u shpreh se Ballkani është rajon që ka shumë rëndësi për Britaninë sot, ashtu siç kishte në kohën kur Tony Blair ishte kryeministër. Mbretëria e Bashkuar, insistoi ai, “do të vazhdojë të luajë rolin e mikes dhe partneres kyç” të Kosovës. Në fjalën e ministrit të jashtëm anglez nuk mungoi përmendja e dialogut me Serbinë.
David Lammy, ministër i jashtëm britanik: Britani dëshiron një “normalizim të qëndrueshëm e paqësor” të marrëdhënieve ndërmjet Kosovës dhe Serbisë. Autoritetet e Kosovës duhet të angazhohen me shumë energji në procesin e dialogut të ndërmjetësuar nga Bashkimi Europian.
Të martën në mbrëmje, kryediplomati britanik u prit në Prishtinë nga kryeministri në detyrë i Kosovës, Albin Kurti, dhe ministrat e Qeverisë së tij.
Kurti ka biseduar me Lammyn, ndër të tjera, rreth situatës aktuale në rajon dhe asaj gjeopolitike në Europë, si dhe për çështjet e sigurisë, ndërsa theksoi faktin që ende nuk ka drejtësi dhe llogaridhënie për sulmin terrorist në Banjskë, teksa Millan Radoiçic endet i lirë dhe i mbrojtur nga aparati shtetëror serb”.
Top Channel
