‘Kam një djalë në Itali, ai më braktisi fare ka 10-15 vjet, s’merr as në telefon, as gjë.
Unë jam për faqe të zezë, unë rroj kot përmbi dhe po thuaj shyqyr i qoftë Zotit, s’do me ma marrë shpirtin, s’do…’ u shpreh Pali Shyte, pensionist.
86-vjeçari Pali Shyte prej vitesh jeton i vetmuar, pa kujdesin e askujt. Në shtëpi ka veç një televizor dhe një sobë elektrike. Shpesh, fatura e energjisë i vjen më tepër se sa pensioni që merr.
“Asnjë të ardhur fare, zero. Kam unë, por do paguaj dritat, janë 230 mijë lekë me gjithë ujë dhe shkurti”, u shpreh pensionisti, Pali Shyte.
“Kur ti, mua pensionistit, korentin ma jep, po me 20% TVSH, ama, ma fal atë 20% dhe më ke ndihmuar goxha”, u shpreh Thoma Mici, pensionist.
Pali 86-vjeçar thotë se djali e ka braktisur prej vitesh. Me të nuk ka asnjë komunikim. Ai di vetëm që i biri jeton në Itali dhe është martuar me një siciliane. Bashkëshortja ka humbur jetën, ndërsa motra e vëllezërit nuk ka. Edhe miqtë e tij bashkëmoshatarë kanë humbur jetën.
“Jam vetëm fare, as motër, as nënë, as babë, as fëmijë, asgjë. Gruaja ka 5-6 vjet që ka vdekur. Nuk shoqërohen me mua se unë jam moshë e madhe, ata janë më të rinj se unë. Mosha ime ka vdekur, kanë ikur të gjithë. S’ka vëllai jot, unë rroj kot për mi dhe hajt, ma e ka shkruar i madhi Zot, sa të jetoj të jetoj”, u shpreh pensionisti, Pali Shyte.
Pali nuk mund të gatuajë dhe ka vështirësi në sigurimin e ushqimit. Fizikisht, e ka të pamundur të shkojë larg banesës. Fqinjët kujdesen herë pas here për të, duke i sjellë ushqim, por edhe sa kohë mund të jetojë nën mëshirën e tyre…?
“Ja, sallatë mora, 2 speca të djegës, 2 simite, kaq”, u shpreh Pali Shyte, pensionist.
Top Channel
