28 parti politike me 1280 kandidatë të certifikuar garojnë në zgjedhjet parlamentare në Kosovë që do të mbahen më 9 shkurt.
Nga këta kandidatë, 23 prej tyre kanë probleme me ligjin në pesë vjetët e fundit. 16 prej tyre kanë aktakuza aktive për veprat penale të natyrës korruptive, keqpërdorim të pozitës, përdorim të armës apo mbajtja në pronësi të armës, pengim i personit zyrtar në kryerjen e punës apo sulm ndaj personit zyrtar.
“Lëvizja Vetëvendosje ka gjithsej 14 kandidatë apo 12% e kësaj liste ka probleme me ligjin, Koalicioni AAK dhe NISMA me tetë kandidatë dhe Lidhja Demokratike e Kosovës me një kandidat”, thotë hulumtuesja Burbuqe Kastrati.
Në raportin e hartuar nga organizatat joqeveritare, INPO, FOL dhe IKD theksohet se tetë kandidatë kanë dënime, pesë janë të Lëvizjes Vetëvendosje dhe një i koalicionit AAK-NISMA.
“Nga tetë kandidatë për deputetë që kanë dënime, njëri prej tyre është i dënuar në dy raste për vepra të ndryshme penale. Tre prej tyre janë të dënuar për vepra penale të natyrës korruptive, konkretisht për mosraportim të pasurisë. Për përdorimin e armës janë dënuar katër kandidatë për deputetë dhe një kandidat për sulm ndaj personit zyrtar dhe kanosje”, shton Kastrati.
Ndërkohë, Gzim Shala nga instituti i Kosovës për Drejtësi thotë se programet e partive politike që garojnë në këto zgjedhje nuk i kanë kushtuar rëndësi strategjisë për sundimin e ligjit.
“Strategjia për sundimin e ligjit del nga procesi pothuajse më i rëndësishëm që Kosova ka zhvilluar në sundimin e ligjit e që është rishikimi i funksionimit të sundimit të ligjit, ky proces i kishte skanuar sistemin e drejtësisë dhe e kishte nxjerrë strategjinë, është për keqardhje mosreferimi në këtë strategji prej asnjërës parti”, thotë ai.
Me ligjin për zgjedhjet e përgjithshme në Kosovë, vetëm një person që është i dënuar në formë të prerë në tre vjetët e fundit për një vepër penale me një ose më shumë vjet burgim, nuk mund të kandidojë në zgjedhje.
Top Channel
