Pas thirrjes nga Komisioni Parlamentar i Medias, Këshilli Drejtues i RTSH-së ka pezulluar deri të hënën vendimin për të skualifikuar nga gara tetë nga 10 kandidatët për drejtues të televizionit publik.
Në një mbledhje urgjente te zhvilluar sot nën drejtimin e nënkryetarit Gëzim Podgorica, me nëntë vota pro është vendosur që e gjithë vendimmarrja të vijojë pasi të zhvillohet një seancë dëgjimore në Komisionin e Medias, e paralajmëruar për në fillim të javës së ardhshme.
Në të njëjtën kohë është marrë vendim që të shtyhet edhe mbledhja e parashikuar për nesër nga Këshilli Drejtues, i cili do të zhvillonte seancë dëgjimore me dy kandidatët e mbetur në garë.
Vendimmarrja e pak ditëve më parë ku përmes një votimi të paligjshëm, shumica e kandidatëve, mes tyre edhe emra të njohur të gazetarisë si Eni Vasili, u lanë jashtë garës, u kritikua ashpër nga Kuvendi ku në një gjuhë te përbashkët PD dhe PS paralajmëruan masa drastike për Këshillin Drejtues nëse nuk do ta rikthente garën në televizionin publik.
I ndodhur në këtë situatë Këshilli me vendimmarrjen e fundit i ka dhënë kohë vetes deri javën tjetër për të parë më pas edhe se si do të vijojë procedura.
Top Channel
