Putin bën deklaratën e fortë: Biden më propozoi shtyrjen e anëtarësimit të Ukrainës në NATO deri në 15 vite 26/12 22:29
Gruaja e diktatorit të rrëzuar sirian, Asma al-Assad është diagnostikuar me leucemi dhe mjekët i kanë dhënë asaj shanset 50/50 për të mbijetuar, shkruan The Telegraph.
Bashkëshortja e Bashar al-Assad, po mbahet larg të tjerëve për të parandaluar infeksionin, sipas medias britanike.
Assad dhe gruaja e tij kërkuan azil në Moskë pasi regjimi brutal humbi kontrollin e tij në pushtet pas 13 viteve të luftës civile shkatërruese.
Presidenca e Sirisë njoftoi në maj të këtij viti se zonja e parë e atëhershme ishte diagnostikuar me leuçemi mieloide akute, një kancer agresiv i palcës së eshtrave dhe gjakut.
Sipas raportimeve të mediave ndërkombëtare, Asma al-Assad, thuhet se ka bërë kërkesë për divorc dhe po kërkon leje për t’u kthyer në Londër për trajtim urgjent mjekësor.
Ajo ka paraqitur dy kërkesa në një gjykatë ruse. Njëra kërkesë është për divorc, dhe së dyti, kërkon leje për t’u larguar nga Moska, ku familja Assad kërkoi strehim pas rënies së regjimit të Bashar al-Assad.
Burime pranë çiftit zbuluan se Asma al-Assad, e cila ka punuar si bankiere investimesh në Londër përpara martesës së saj me Basharin, është e “etur” të kthehet në Mbretërinë e Bashkuar për kujdesin e duhur mjekësor.
Nëna e saj, Sahar al-Akhras, një ish-diplomate siriane dhe shtetase britanike, thuhet se ka angazhuar firma kryesore ligjore në Londër për të lehtësuar kthimin e vajzës së saj.
Ky veprim vjen vetëm disa javë pasi familja Assad u largua nga Damasku pasi forcat rebele morën kontrollin e kryeqytetit sirian. Thuhet se Asma pretendon se ajo nuk po merr kujdesin e duhur mjekësor në Moskë, ku familja ka qëndruar përkohësisht.
Divorci i mundshëm i shton një shtresë tjetër kompleksiteti sfidave me të cilat përballet Bashar al-Assad, i cili tashmë ka humbur pushtetin pas dekadash sundimi autoritar. Ndarja mund të ketë pasoja të rëndësishme për të ardhmen e ndikimit politik të familjes Assad në rajon.
Asma, e cila dikur u përshëndet si “Trëndafili i Shkretëtirës” nga mediat perëndimore, u martua me Bashar al-Assad në vitin 2000, pak pasi ai pasoi babain e tij si president.
Top Channel
