Analiza/ Besimi i amerikanëve në sistemin gjyqësor bie në nivel rekord

Në Shtetet e Bashkuara është shënuar rënie prej 24 përqindësh e besimit në sistemin e drejtësisë gjatë katër viteve të fundit. Kjo i dallon Shtetet e Bashkuara nga vendet e tjera të pasura, ku shumica e banorëve shprehin ende besim në sistemet e tyre të gjyqësorit.

Rezultatet vijnë pas një periudhe të trazuar që përfshinë heqjen e abortit si të drejtë në të gjithë vendin, aktakuzat kundër ish-Presidentit Donald Trump dhe tërheqjen e mëvonshme të akuzave federale dhe sulmet e tij ndaj integritetit të sistemit gjyqësor.

Rënia e besueshmërisë nuk ishte e kufizuar vetëm në njërin skaj të spektrit politik. Besimi ra midis njerëzve që janë të kënaqur me udhëheqjen e vendit gjatë presidencës së zotit Joe Biden dhe atyre që nuk janë të kënaqur, sipas ‘Gallup-it’. Të anketuarit nuk janë pyetur për përkatësitë e tyre partiake.

Është bërë normale që njerëzit të cilët nuk janë të kënaqur me udhëheqjen e vendit të humbasin të paktën njëfarë besimi në sistemin gjyqësor. Megjithatë, rënia prej 17 për qind, në mesin e atij grupi gjatë presidencës së zotit Biden, ishte e shpejtë. Rastet gjyqësore kundër zotit Trump ishin faktorë të mundshëm, sipas ‘Gallup-it’.

Midis atyre që ishin të kënaqur me udhëheqjen e vendit, pati një rënie prej 18 për qind, midis viteve 2023 dhe 2024, ndoshta duke reflektuar pakënaqësinë me vendimet e gjykatës që favorizonin zotin Trump, njoftoi ‘Gallup’. Besimi në sistemin gjyqësor ka qenë mbi 60% në mesin e këtij grupi gjatë tre viteve të para të presidencës së zotit Biden, por shënoi rënie këtë vit.

Zoti Trump u përball me katër padi penale këtë vit, por vetëm njëri rast në Nju Jork përfundoi me gjykim dhe dënim përpara se të fitonte garën presidenciale.

Që atëherë, Prokurori i Posaçëm Jack Smith pushoi dy çështjet e tij federale, të cilat kanë të bëjnë me dyshimet se zoti Trump bëri përpjekje për të përmbysur humbjen në zgjedhjet e vitit 2020 dhe pretendimet se ai mori dokumente të klasifikuara në pronën e tij në Mar-a-Lago, në Florida. Një rast i veçantë i ndërhyrjes në zgjedhjet shtetërore në qarkun Fulton të Xhorxhias, është në pritje. Presidenti i zgjedhur Trump i mohon të gjitha akuzat.

Gjetjet e tjera të sondazhit të ‘Gallup-it’ tregojnë se besimi i demokratëve në Gjykatën e Lartë ra me 25 për qind midis viteve 2021 dhe 2022, viti kur Gjykata shfuqizoi një vendim të mëparshëm për abortin, duke ia kthyer çështjen e abortit shteteve, që të vendosin vetë përmes ligjeve të tyre individuale. Besimi i tyre u rrit pak, në 34%, në vitin 2023, por ra sërish në 24% gjatë këtij viti. Ndryshimi vjen pas një opinioni të Gjykatës së Lartë se zoti Trump dhe ish-presidentë të tjerë kanë imunitet të gjerë nga ndjekja penale.

Besimi në Gjykatën e Lartë midis republikanëve, në të kundërt, arriti në 71% në vitin 2024.

Sistemi gjyqësor humbi besimin e publikut më shpejt se shumë institucione të tjera amerikane gjatë katër viteve të fundit. Besimi në qeverinë federale, për shembull, gjithashtu ra në 26%. Kjo ishte një rënie prej 20 pikësh, jo aq e madhe sa rënia e besimit në gjykata.

Rënia e besimit është gjithashtu e madhe në krahasim me vendet e tjera në mbarë botën. Vetëm një pjesë e vogël e vendeve të tjera kanë patur rënie më të mëdha gjatë një periudhe katërvjeçare. Ato përfshijnë një rënie prej 46 përqindësh në Mianmar, gjatë periudhës së rikthimit të sundimit ushtarak në vitin 2021. Në Venezuelë u shënua rënie prej 35 përqindësh në mes të trazirave të thella ekonomike dhe politike nga viti 2012 në vitin 2016 dhe një rënie prej 28 pikësh në Siri, para dhe gjatë viteve të para të luftës civile.

Sondazhi u bë përmes intervistave telefonike me rreth 1000 amerikanë të moshës madhore midis 28 qershorit dhe 1 gushtit./VOA

Top Channel