Dy persona janë arrestuar këtë të martë në pikën doganore të Kapshticës, pasi u kapën me drogë.
Mësohet se droga u gjet e fshehur në një kamion, me peshë deri në 50 kg. Sipas informacioneve, u arrestuan babë e bir, nga Tirana, të cilët do të transportonin drogën e llojit canabiss sativa drejt shtetit grek.
Kamioni u fut në skaner atje ku u konstatua e fshehur lënda narkotike në rimorkio, ndërsa u bë arrestimi i menjëhershëm i dy personave që kishin si synim futjen e drogës në Greqi.
Droga dyshohet se do të çohej drejt Turqisë, ndërsa dy të arrestuarit kanë deklaruar se nuk kanë dijeni për sasinë në kamion. Mësohet se ka të tjerë persona të përfshirë dhe po hetohet për të zbuluar organizimin e transportit.
Njoftimi i policisë:
Korçë/Finalizohet nga Sektori për Hetimin e Narkotikëve i DVP Korçë, në bashkëpunim me DVKM Korçë, operacioni i koduar “Shufrat”, për goditjen e një rasti të tentativës për trafikim të lëndëve narkotike.
Gjatë operacionit u sekuestruan 56 kilogramë lëndë narkotike cannabis sativa, kamioni ku ishte fshehur lënda narkotike dhe 1300 euro.
Në kuadër të operacionit u arrestuan shtetasit: D. H., 68 vjeç dhe A. H., 35 vjeç, banues në Tiranë (babë e bir).
Në PKK Kapështicë, në dalje të RSh-së, shërbimet e Policisë, bazuar në inteligjencën policore, kanë kaluar për kontroll në vijën e dytë, automjetin kamion me drejtues shtetasin A. H dhe pasagjer shtetasin D. H. Gjatë kontrollit, në pjesën e tavanit të rimorkios së kamionit u konstatuan të montuara 44 shufra metalike, në të cilat ishin fshehur sasi lënde narkotike cannabis sativa, me peshë totale 56 kilogramë.
Në vijim të veprimeve procedurale u shpall në kërkim shtetasi F. K., 38 vjeç, banues në Tiranë, pasi dyshohet si posedues i lëndës narkotike dhe bashkëpunëtor në trafikimin e saj.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Top Channel
