Kryetari i Bashkisë së Elbasanit, Gledian Llatja, ndodhet këtë të mërkurë pranë ambienteve të kompanisë Kurum, pas disa ditësh negociata për çështjen e 500 punonjësve të larguar nga puna.
Pas mbledhjes me drejtuesit e kompanisë, Llatja tha se u arritën disa marrëveshje për punonjësit.
“Çdo punëtor që do të vazhdojë punën do të trajtohet me pagesë të plotë. Të gjithë punonjësit e tjerë do të trajtohen me pagë 35.000 me afat të pacaktuar derisa të nisë prodhimi. Për uzinën e petëzimit morëm garanci se do të hapet brenda këtij viti kalendarik“, tha kryebashkiaku.
Edhe pse zyra e shtypit e Kurum njoftoi që do të kishte një dalje publike nga përfaqësues të kompanisë, kjo e fundit sërish zgjodhi heshtjen duke mos u përballur me gazetarët për çështjen sensitive të mbetjeve toksike.
Tashmë, Kurum po hetohet nga Prokuroria e Durrësit për mbetjet e rrezikshme që u nisën nga porti i Durrësit me destinacion Tajlandën. Gjithashtu për këtë çështje ka nisur edhe një hetim ndërkombëtar.
Top Channel
