Prokuroria angleze është tërhequr nga akuzat ndaj një shqiptari dhe bashkëpunëtorëve të tij të arrestuar nën akuzën e pengmarrjes të një fieraku në Londër.
Nekid Arapi i njohur në Angli me pseudonimin Kid Vlonjati është dënuar me vetëm 16 muaj burg për posedim dhe tentativë shitje droge klasi B.
Ndaj tij ranë akuzat për pengmarrje, burgosje të rreme dhe kërcënime për vrasje personi për të cilat nëse do shpallej fajtor mund të dënohej nga gjykata Harrow Crown Court deri me burg përjetë.
Një zyrtar i kësaj gjykate i tha Top Channel se u rrëzuan akuzat edhe për të arrestuarit e tjerë Xhon Guveli 28 vjeç, i arrestuar nën akuzën për rrëmbim person, burgosje të rreme.
Fation Arapi 27 vjeç, banues ne New Road, Peterborough, i arrestuar në akuzën për rrëmbim personi, burgosje te rreme.
Armando Brahashaj 26 vjeç banues në Aylestone Avenue, Brent, Londër, i arrestuar nën akuzën për rrëmbim person, burgosje te rreme.
Eduart Cepele 30 vjeç, banues në Barrington Street, Mancester, i akuzuar nën akuzën për rrëmbim person, burgosje te rreme.
Emanulea Arapi 28 vjeçe, banuese në Barrington Street, Mancester e arrestuar në akuzën për burgosje të rreme. Ata fituan menjëherë lirinë nga salla e gjyqit.
Vitin e shkuar Top Channel raportoi se një 30-vjeçar u mbajt peng për 12 ditë dhe pak përpara se të mbaronte afati për të paguar 400.000 stërlina u arrestuan ata që e kishin e marrë peng.
Për lirimin e tij, u përfshi Drejtoria për Marrëdhëniet me Jashtë në Policinë e Shtetit, duke bashkëpunuar me NCA- FBI-n britanike dhe Policinë Metropolitane.
Pas lirimit, 30-vjeçari i marrë peng qëndroi në spital, nën ruajtjen e policisë.
Ai kishte dëmtime të shumta trupore pas një dhune të fortë gjatë kohës kur u mbajt peng ne lindje të Londrës. I ishin hequr me pinca edhe thonjtë.
Personi i marrë peng në komunitetin shqiptarë në Angli njihej si një person problematik dhe jo korrekt në pazaret e drogës prodhuar në shtëpitë e barit.
Komentet në rrjetet sociale e përshkruajnë si një person i cili i kishte bërë “gola” shqiptarëve të përfshirë në shtëpitë e barit.
E shkuara e tij e errët ka dalë në pah nga hetimet pasi ai u lirua si peng.
Nëse ai do të dëshmonte në gjykatë avokatët mbrojtës të Arapit dhe të tjerëve do ta diskreditonin dhe ai paçka se ishte viktima pengmarrjes do të shpallej një dëshmitarë jo i besueshëm.
Me sa duket prokuroria angleze për të evituar këtë është tërhequr nga akuzat. Një arsye tjetër mund të jetë edhe tërheqja nga dhënia dëshmi e fierakut që u mor peng. Familjes së tij në Fier i kërkohej të paguante një “dëm” prej 400.000 stërlina.
Pengmarrësit duke përdorur telefonin e pengut me video-call telefononin të vëllain më Patos duke i treguar si po e torturonin në ambientet ku e mbanin të lidhur.
Përfshirja e shqiptarëve në biznesin e shtëpive të barit në Britaninë e Madhe ndër vite ka prodhuar krime të tjera edhe më të rënda si pengmarrje, grabitje dhe vrasje të disa shqiptarëve brenda ambienteve ku mbillet dhe rritet kanabisi.
Top Channel
