Fiks Fare denoncoi të premten një agjenci, e cila pasi u mori paratë qytetarëve për t’i dërguar në Angli, nuk iu përgjigj dhe s’iu ktheu shumat. Por, pas interesimit të emisionit investigativ, denoncuesit morën paratë mbrapsht. Në redaksinë e Fiksit u ankua Andi Josifi, i cili thotë se ka parë në rrjetet sociale për një agjenci e quajtur “Alxher”, me pronare dhe administratore znj. Xherina Nasufi.
“Zyrat i ka te ‘rruga e Kavajës’, në një pallat në kat të katërt. Vjet në gusht shkova te kjo agjenci dhe aplikova për të punuar në Angli fermer, në bujqësi. Do më nxirrte kontratën e punës. Bëra një kontratë me këtë kompani. Kontratën ma dërguan në e-mail. E plotësova online dhe ua dërgova. Të njëjtën gjë bëri edhe vëllai dhe një shoqe e vëllait. Pronaren Xherinën e takuam vetëm njëherë ku na premtoi se do na nxirrte kontratën për në Angli” thotë Andi.
Ai shton se, pasi plotësuan kontratën, në mes të gushtit 2023 i dërguam edhe paratë kësaj agjencia. “Secili nga ne pagoi 350 euro. Gjithsej 1.050 euro. Në kontratë parashikohej që brenda 4 muajsh kjo agjenci do na siguronte kontratën. 4 mujorëshi përfundoi në mes të dhjetorit dhe në kontratë parashikohej që, kur të mbaronte afati 4 mujor, agjencia do na kthente lekët nga 1 deri në 6 muaj. 6 mujorëshi përfundoi në mes të qershorit dhe kjo pronare dhe agjencia as nuk duken, janë zhdukur. Kam shkuar me dhjetëra herë te zyrat, në rrjete sociale dhe asnjë përgjigje të tyre. As telefonin dhe as rrjetet sociale. Unë kërkoj të më kthejnë paratë. Nuk janë shumë, por janë të miat” thotë Andi, i cili ka edhe disa dyshime. “Dyshoj se është një skemë, pasi megjithëse paguam nga 350 euro, do na kthejnë vetëm 300 mijë lekë. Kush e di sa persona të tjerë do kenë paguar si puna ime dhe asnjë gjë. As kontratë s’na sollën, na mbajtën zvarrë dhe as paratë mbrapsht” përfundon ai.
Pas ankesës, Andi shkon te Agjencia në “rrugën e Kavajës”, por dera e zyrës ishte e mbyllur. Asnjë nuk i përgjigjet, megjithëse insiston disa herë. Ai telefonon disa numra telefoni, disa të padisponueshëm ndërsa një tjetër që është funksional nuk përgjigjet njeri.
Gazetarët e Fiks Fare, bashkë me Andin, shkojnë te Agjencia “Alxher”, ku zërish e gjejnë derën e mbyllur. Presin me minuta të tëra, por asnjë gjurmë të punonjësve dhe të pronares. Telefonojnë numrat, por sërish disa jashtë funksioni dhe të tjerë që nuk përgjigjen.
Në numrin funksional, që ndodhej në Qendrën Kombëtare të Biznesit, Fiksi i dërgon një mesazh dhe pas disa orësh telefonon pronarja Xherina Nasufi. Gazetarët i bëjnë me dije problemin dhe ajo thotë se “kam qenë në spital ndaj nuk i jam përgjigjur klientëve”. Fiksi i thotë se janë disa denoncues, ndërsa pronarja përgjigjet se do të shohë kontratat dhe do t’na kthente përgjigje. Ajo kërkon emrat e denoncuesve dhe se do të shohë afatet. Fiksi i dërgon emrat e personave që kanë kryer pagesën dhe ajo përgjigjet se “po, ka kaluar afati dhe se do të veprojë”. E pyesin nëse do t’u kthejë paratë, teksa nuk kthen përgjigje.
Ndërkohë, disa ditë pas interesimit të Fiks Fare, pronarja e agjencisë kontaktoi denoncuesin Andi Josifin, duke i kaluar edhe pagesën në llogarinë bankare. “Kisha 1 vit që as më kthente përgjigje dhe më sorollaste. Pas interesimit tuaj, më kontaktoi direkt dhe pranoi se kishte kaluar afati. Faleminderit Fiks Fare, më zgjidhet këtë problem. Agjencia më ktheu mua lekët, vëllait dhe shoqes së vëllait” përfundon Andi.
Top Channel
