Gjykata e Posaçme shtyn seancën paraprake për kalimin ose jo për gjykim të dosjes “Metamorfoza”, pasi mungonte avokati i Xhevahir Litës.
Sipas gazetares së Top Channel, Anila Hoxha, mungesa e tij ishte për shkaqe shëndetësore. Seanca e radhës do të mbahet më datë 24 maj në orën 10 e 30 minuta.
Prokuroria e Posaçme (SPAK), më 4 maj dha detaje me anë të një njoftimi zyrtar lidhur me përfundimin e hetimeve për të pandehurit e akuzuar për dosjen “Metamorfoza”, ku shfaqeshin në biseda të aplikacionit “SKY” ku porosisnin eleminimin fizik të kundërshtarëve të tyre.
Ashtu siç edhe raportoi më parë gazetarja e Top Channel, Anila Hoxha, hetimi për Ervis Martinajn mbi përfshirjen e tij në këtë dosje, është veçuar. I shumëkërkuari, shfaqet në bisedat me Behar Bajrin të cilit i kërkon vrasjen e Gjin Ndojit.
Në përfundim të hetimeve, SPAK dërgoi për gjykim dosjen ndaj të pandehurve, Pëllumb Gjoka, Edmond Preka dhe Behar Brajoviç për vrasjen e Gjin Ndojit, si dhe Astmer Bilalit e Ardirit Hasanbegaj për sigurimin e mjeteve për atentatin ndaj Dorian Dulit dhe Ibrahim Licit.
Ndërsa ish-shefi i Operacionales, Oltion Bistri akuzohet për zbulimin e të dhënave sekrete, prishjen e provave dhe korrupsionin e zyrtarëve publikë.
Prokurorit të Shkodrës Xhevair Lita që shfaqej duke komunikuar me anëtarë të grupit për zhvillimin e dosjeve hetimore , i është hequr akuza e grupit kriminal. Ish-zyrtari i drejtësisë do të përballet me gjykatën për akuzën e akuzat e korrupsionit dhe nxjerrjes së sekretit hetimor.
Në njoftimin e SPAK, përmenden edhe pasuritë e sekuestruara në pronësi të të pandehurve të cilët shfaqen në dosjen “Metamorfoza”.
Top Channel
