Konsumimi i qepës së kuqe ndihmon në luftimin e kancerit, sugjeron një studim i ri. Kjo perime është e pasur me përbërës të fuqishëm që ndihmojnë në zhdukjen e tumoreve.
Një prej tyre, i njohur ai antocianina, që është përgjegjës për ngjyrën e kuqe të qepës, mendohet se parandalon përhapjen e sëmundjes. Një flavonoid tjetër, i quajtur kuercetinë, ka të njëjtat efekte në tkurrjen e masës tumorale.
Pavarësisht ngjyrës, çdo lloj qepe mund të ndihmojë në zhdukjen e qelizave kancerogjene, thonë shkencëtarët kanadezë. Autori kryesor i studimit, Abdulmonem Murayyan, nga Universiteti Guelf në Kanada, tregon: Kemi zbuluar që qepët janë të jashtëzakonshme në zhdukjen e qelizave kancerogjene. Qepët aktivizojnë teknikat që nxisin qelizat kancerogjene të shkojnë drejt vdekjes. Ato krijojnë një ambient të pafavorshëm për qelizat kancerogjene dhe pengojnë komunikimin mes tyre, duke penguar kështu shtimin e tyre. Ka kuptim që qepët e kuqe, që kanë ngjyrë më të errët, të kenë fuqinë më të madhe në luftimin e kancerit.
Gjatë këtij studimi të ri, hulumtuesit shkencorë vendosën qelizat e kancerit të zorrës së trashë në kontakt të drejtpërdrejtë me ekstraktet e kuercetinës nga pesë lloje të ndryshme të qepës. Vetëm qepa e kuqe rezultoi të kishte më shumë fuqi në luftimin e këtyre qelizave kancerogjene.
Ato rezultuan pozitive edhe në luftimin e qelizave kancerogjene të gjirit. Shkencëtarët shpresojnë që shumë shpejtë të testojnë këto përbërës edhe tek njerëzit. Qepët janë perimet që përmbajnë më shumë kuercetinë, përbërësi që mendohet se luan rolin kryesor në zhdukjen e qelizave kancerogjene.
Top Channel
