![](https://top-channel.tv/wp-content/uploads/2024/09/MixCollage-07-Sep-2024-05-33-PM-5997-800x450.jpg)
Pothuajse gjysma e evropianëve kanë një opinion pozitiv për presidentin ukrainas Volodymyr Zelensky, por mendimet ndryshojnë shumë në shtetet anëtare.
Ky është një nga përfundimet nga një sondazh i Euronews.com i kryer nga Ipsos midis pothuajse 26,000 të anketuarve në 18 shtete anëtare përpara zgjedhjeve për Parlamentin Evropian, të cilat do të mbahen midis datave 6 dhe 9 qershor.
Sondazhi i parë i këtij lloji tregon se 47% e evropianëve kanë një opinion “pozitiv” për Volodymyr Zelenskyn, ndërsa 32% kanë një pikëpamje “negative”.
Ndërkohë, 21% thonë se “nuk dinë mjaftueshëm” për presidentin, i cili ka qenë kryefjala e lajmeve për dy vitet e fundit dhe ka udhëtuar gjerësisht nëpër kontinent për të folur në emër të kombit të tij të shkatërruar nga lufta.
Por sondazhi ekskluziv i Euronews/Ipsos ofron gjithashtu njohuri se si ndihen evropianët për liderët e tjerë të shquar në kontinent.
Presidenti francez Emmanuel Macron është i dyti në renditjen “si më i pëlqyer”, me 41% të të anketuarve që thonë se kanë një opinion “pozitiv” për të në krahasim me 34% që thonë “negativ”.
Nuk është për t’u habitur që populli francez ka kritikët më të ashpër, me 62% që zgjedhin “negativ” dhe vetëm 28% “pozitiv”.
Popullariteti i Macron ka një vlerësim pozitiv në Rumani (57%), Greqi (55%), Gjermani (53%), Danimarkë (52%) dhe Holandë (50%).
Kancelari gjerman Olaf Scholz provokon një indiferencë më të madhe: 38% e të anketuarve thonë se “nuk dinë mjaftueshëm” për njeriun që drejton ekonominë më të madhe të bllokut, ndërsa 29% shprehin një opinion “pozitiv” dhe 33% “negativ”.
Katër vende dallohen në mospëlqimin e tyre ndaj socialistit 65-vjeçar: Gjermania (61% negativ), Austria (47%), Greqia (45%) dhe Polonia (39%).
Giorgia Meloni e Italisë, Pedro Sánchez i Spanjës dhe Donald Tusk i Polonisë janë në opsionin e “nuk di mjaftueshëm” (përkatësisht 43%, 58% dhe 50%).
Si rezultat, asnjë nga të tre nuk mund të thuhet se është veçanërisht i pëlqyer ose i papëlqyer. Jashtë Italisë, Meloni përballet me vlerësim jo të mirë vetëm në Spanjë, ku 44% kanë një mendim “negativ”.
Pjesëmarrësit e anketimit në Rumani votojnë pozitivisht për Melonin (54%), për Sánchez (49%) dhe Tusk (53%).
Ndërsa për Viktor Orbán 48% e të anketuarve kanë një opinion “negativ”.
Vetëm 15% kanë një vlerësim “pozitiv” për të. Pjesa tjetër (37%) deklarojnë se “nuk dinë mjaftueshëm”.
Në Hungari, ku Orbán qeveris me një shumicë të pakundërshtueshme, 54% e pjesëmarrësve kanë një opinion “negativ” për kryeministrin e tyre dhe 32% “pozitiv”.
Sondazhi i Euroneës/Ipsos mbyllet me një shqyrtim të presidentit rus Vladimir Putin, i cili është deri tani lideri më i papëlqyeri.
79% e të anketuarve kanë një opinion “negativ” për njeriun e kërkuar nga Gjykata Penale Ndërkombëtare (ICC) për krimet e luftës në Ukrainë.
Nga ana tjetër, 10% kanë një mendim “pozitiv” për të, dhe 11% “nuk e njohin mjaftueshëm”.
Çfarë bie në sy është fakti se Bullgaria del si një rast i jashtëzakonshëm: 37% e të anketuarve kanë një opinion “pozitiv” për Putinin, shifra më e lartë në të gjithë botën.
Top Channel