Banka Qendrore e Kosovës nuk jep shenja se mund të lëvize nga qëndrimi i saj për dinarin, por njoftoi se ka hapur një linjë telefonike pa pagesë për t’i krijuar serbëve të Kosovës mundësinë të informohen më në detaj lidhur me rregulloren e saj për pagesat me para kesh, që ndalon përdorimin e dinarit serb.
Linja në fjalë, deklaroi BQK, “i dedikohet krejtësisht qytetarëve nga komuniteti serb që jetojnë në Republikën e Kosovës dhe kanë nevojë të informohen drejt dhe konkretisht”.
Vendimi i saj erdhi pas përplasjeve të kryeministrit të Kosovës, Albin Kurti, dhe presidentit serb, Aleksandar Vuçiç në seancën e jashtëzakonshme të Këshillit të Sigurimit të OKB-së në Nju Jork, e thirrur nga Serbia kryesisht për çështjen e dinarit. Rregullorja që e përcakton euron si valutën e vetme që mund të përdoret për pagesa kesh në gjithë vendin, hyri në fuqi më 1 shkurt, me gjithë trysninë e madhe ndërkombëtare për shtyrjen e zbatimit të saj.
BQK-ja e përsëriti edhe një herë se ajo nuk e ndalon apo kufizon pranimin e parave në llogaritë bankare në euro në bankat e licencuara dhe se nuk kufizon aktivitetin këmbimor të çdo lloj valute që kryhen nga institucionet financiare bankare ose jo-bankare të licencuara nga ajo.
“Nuk ndalon transfertat nga asnjë shtet. Nuk ndalon zotërimin dhe kursimin ne asnjë valute që nuk është euro përfshirë dinarin”, nënvizohet në njoftim.
Top Channel
