Në burg për nxjerrje të sekreteve shtetërore, ish-kryeministri pakistanez dënohet sërish për korrupsion! 14 vjet burg për të dhe bashkëshorten

Khan, i cili u rrëzua si kryeministër nga kundërshtarët e tij në vitin 2022, po vuan tashmë një dënim prej tre vitesh burg pasi u dënua për korrupsion. Të martën ai u dënua gjithashtu për nxjerrje të sekreteve shtetërore dhe të mërkurën u dënua me 14 vjet në një tjetër rast korrupsioni.

Khan ka thënë se rastet e shumta kundër tij janë të motivuara politikisht. Këto dënime të fundit vijnë vetëm një javë përpara zgjedhjeve të Pakistanit më 8 shkurt – një votim në të cilin atij i ndalohet të kandidojë dhe ku partia e tij, Pakistani Tehreek-e-Insaf (PTI), është përballur me kufizime të fushatës.

Besohet se dënimet ndaj tij do të kryhen njëkohësisht. Khan ka qenë tashmë i ndaluar, kryesisht në burgun e Adiala, që nga arrestimi që iu bë gushtin e kaluar. Edhe bashkëshortja e tij Bushra Bibi u burgos pas vendimit të marrë sot. Khan dhe Bibi u martuan në vitin 2018, disa muaj përpara se Khan të zgjidhej kryeministër.

Ata i kishin mohuar akuzat se kishin shitur dhuratat shtetërore që kishin marrë në detyrë për përfitime personale. Së bashku me dënimet 14-vjeçare, ata u urdhëruan gjithashtu të paguanin një gjobë prej rreth 5.3 milion dollarë.

Të mërkurën, partia PTI e Khan tha se dënimi më tej nënkuptonte se ish-kryeministri do të skualifikohet gjithashtu për 10 vjet nga mbajtja e posteve publike. Një zëdhënës i partisë së tij e përshkroi vendimin si: “Një ditë tjetër e trishtuar në historinë e sistemit tonë gjyqësor, i cili po shpërbëhet.”

Ish-kryeministri e priti me kritika vendimin e gjykatës të martën, ku u shpall fajtor për zbulimin e një dokumenti të klasifikuar dhe për dëmtimin e marrëdhënieve diplomatike. Khan dhe partia e tij PTI e kishin përshkruar atë rast dhe të tjerët kundër tij si fals, duke argumentuar se procedurat janë kryer me nxitim.

Khan, një ish lojtar ndërkombëtar i kriketit, u kishte thënë ndjekësve të tij që “të hakmerren për çdo padrejtësi me votën tuaj më 8 shkurt duke qëndruar i qetë” në një deklaratë të publikuar në llogarinë e tij X.

“Thuajuni se ne nuk jemi dele që mund të ngasin me shkop”, tha ai.

Top Channel