Kosova Kryesore Të Fundit

Osmani takim me Lajçak/ Fokusi i diskutimeve dialogu me Serbinë, presidentja: E nevojshme të hiqen masat e BE-së ndaj Kosovës

30/01/2024 16:22

Presidentja e Republikës së Kosovës Vjosa Osmani ka pritur sot në takim përfaqësuesin special të Bashkimit Evropian, Miroslav Lajçak.

Në takim u diskutua për zhvillimet e fundit në procesin e dialogut me Serbinë, me ç’rast Presidentja Osmani ritheksoi përkushtimin e Kosovës si palë konstruktive në këtë proces.

“Presidentja theksoi se marrëveshja e Brukselit e 27 shkurtit 2023 dhe aneksi i Ohrit i 18 marsit 2023 duhet të zbatohen”, kështu njofton Presidenca e Republikës së Kosovës në një postim në Facebook.

Spas tyre presidentja Osmani ritheksoi nevojën e heqjes së masave të Bashkimit Evropian ndaj Kosovës, të cilat janë të padrejta dhe krijojnë mungesë ekuilibri në dialog.

Në këtë drejtim, ajo përsëriti se Kosova ka ofruar organizimin e zgjedhjeve të reja në veri të vendit në përputhje me kornizën ligjore të Kosovës, duke miratuar edhe udhëzimin administrativ, ndërkaq theksoi që kjo e drejtë e qytetarëve të realizohet pa vonesa e në përputhje me procedurat dhe legjislacionin në fuqi.

Në këtë takim u mirëpritën arritjet më të fusnit sa i përket zbatimit të marrëveshjes për energji si dhe asaj për targa, si hapa drejt normalizimit të raporteve ndërmjet Kosovës e Serbisë.

Sa i përket draftit të statutit të Asociacionit, presidentja ritheksoi se institucioni i vetëm që mund ta interpretojë përfundimisht përputhshmërinë e këtij akti me Kushtetutën është Gjykata Kushtetuese e Kosovës, teksa po ashtu shprehu shqetësimet e saj lidhur me disa dispozita të këtij drafti, të cilat mund të jenë sfiduese gjatë zbatimit në praktikë.