Gjykata e Posaçme e Apelit për Korrupsionin dhe Krimin e Organizuar ka lënë në fuqi vendimin për ish-prefektin e Kukësit, Granit Gjana.
Granit Gjana u pezullua nga gjykata me urdhër të prokurorëve të posaçëm. Gjana është paraqitur më herët në SPAK, ku u mor në pyetje për akuzën e shkeljes së barazisë në tendera. Bëhet fjalë për abuzimin me tenderin me vlerë 21 milion lekë për një karburant.
Komunikimet në WhatsApp mes Kujtim Elezajt dhe Uran Cengut gjatë tre muajve treguan se si për një tender për karburant, të hapur nga bashkia, subjekti “Ufo Cengu” kërkoi në datë 30 janar dokumente për autorizim mbi tregtinë e lëndëve djegëse. Por pretendenti u mbajt peng nga bashkia deri në datën 8 shkurt duke e protokolluar me vonesë, një veprim ky administrativ që solli skualifikimin e subjektit.
Njoftimi i Apelit të GJKKO.
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Florjan Kalaja, sot më 05.01.2024, ora 11:00, shpalli vendimin mbi çështjen penale nr. 62 akti, datë 29.12.2023 regjistrimi, regjistruar mbi ankimin e personit nën hetim G.Gj., me objekt: “Ankim ndaj vendimit nr. 133, datë 01.02.2023 dhe vendimit nr. 126, datë 17.11.2023, verifikuar me vendimin nr. 135, datë 07.12.2023 të Gjykatës së Posaçme të Shkallës së Parë për Korrupsionin dhe Krimin e Organizuar” në lëndë të masave të sigurimit personal, dhe vendosi:
– Miratimin e vendimit nr. 133, datë 01.12.2023 të Gjykatës së Posaçme të Shkallës së Parë për Korrupsionin dhe Krimin e Organizuar.
– Miratimin e vendimit nr. 135, datë 07.12.2023 të Gjykatës së Posaçme të Shkallës së Parë për Korrupsionin dhe Krimin e Organizuar.
– Kundër këtij vendimi mund të bëhet rekurs në Gjykatën e Lartë brenda 45 ditëve, duke nisur ky afat nga e nesërmja e njoftimit të vendimit të arsyetuar.
Top Channel
