Analiza/ Si e sheh botën Marco Rubio, i zgjedhuri i Trumpit për sekretar të Shtetit? 13/11 22:43
Kompania që zotëron rrjetin Facebook, Meta, ka censuruar sistematikisht zërat dhe përmbajtjet pro-Palestinë në platformat e saj globale gjatë konfliktit brutal izraelito-palestinez, thuhej sot në një raport të grupit të të drejtave ‘Human Rights Watch’.
Dokumenti me 51-faqe denoncon se grupi Meta, ka fshirë ose nuk ka lënë të bëhen publike postimet e përmbajtjet pro-Palestinë, “duke përfshirë dhe mbështetje paqësore ndaj kauzës së Palestinës”.
Pas një sulmi të Hamas brenda Izraelit ku raportohet se u vranë rreth 1000 civilë, ushtria izraelite nisi bombardimet dhe pushtimin e Gazës ku rreth 20 000 palestinezë janë vrarë deri tani, sipas ministrisë së shëndetësisë në Gaza.
Rrethimi dhe izolimi i mëtejshëm i Gazës nga Izraeli ka cuar në një katastrofë humanitare për rreth 2 milionë banorët e Rripit të Gazës, shumica e tyre të mitur.
Në raportin e Human Rights Watch thuhej mes te tjerash: “Censurimi nga Meta i përmbajtjeve në mbështetje të Palestinës i shtohet vuajtjeve të civileve, në një kohë masakrash të pathëna që palestinezët po vuajnë”.
“Censura është një tjetër hap për fshirjen e palestinezëve”, shkruante grupi i të drejtave pasi kishte analizuar 1,050 raste të censurës online në më shumë se 60 shtete.
Raporti theksonte të paktën 100 raste censure të fshehjes së postimeve pro-Palestinës me taktika si “heqje e përmbajtjes, pezullime ose bllokime të llogarive, mospublikimin e përmbajtjes ose paaftësi të gjetjes së tyre”.
Meta nuk iu përgjigj kërkesës për komente nga rrjeti britanik The Independent.
Zhvillimi vjen pasi senatorja amerikane Elizabeth Warren i dërgoi një letër kreut të Meta Mark Zuckerberg ku kërkonte informacion për censurimin e përmbajtjeve pro-Palestinë.
“Është e rëndësishme që platformat e rrjeteve sociale të mos censurojnë përmbajtjet e vërteta e të ligjshme, veçanërisht kur njerëzit e komunitetet kërkojnë aty informacionet për zhvillimet në rajon”, thuhej në letër, sipas rrjetit The Intercept.
Human Rights Watch sinjalizonte rastet e kufizimeve të përmbajtjeve në rrjetet Instagram/Facebook Live, duke reduktuar shikueshmërinë ose shpërndarjen e postimeve të tilla nga individë apo grupe, si dhe duke mos shpërndarë njoftimet e tyre të zakonshme.
Top Channel
