Inside Story/ Dosja e vetëvrasjes së 11-vjeçarit, a u ndikua nga rrjetet sociale?

20/12/2023 21:53

Ishte 6 maj i vitit 2021 kur salla operative e Komisariatit të Policisë së Shkodrës u njoftua se në Spitalin Rajonal kishte shkuar një pacient i mitur i cili ishte pa shenja jete.

Bëhej fjalë për një 11 vjeçar nga fshati Gur i Zi. Ai ishte vetëvarur në mjediset e shtëpisë. Babai i viktimës kishte deklaruar para hetuesve se nuk kishte vërejtur ndonjëherë ndonjë shqetësim nga sjellja e djalit të tij tashmë të ndjerë.

Siç citohet në dosjen e Prokurorisë së Shkodrës për rastin, është kontrolluar telefoni i viktimës e më pas është sekuestruar për t’i bërë një ekspertim më të specializuar.

Është marrë vendim për kryerjen e ekspertiit Teknik dhe aparati së bashku më vendimin e datës 16.09.2021 është dërguar në IPSH, Tiranë. Edhe pas rreth 1 viti nga vendimi rezulton se nuk është përfunduar akti i ekspertimit teknik.

Nga hetimi i ngjarjes ka rezultuar se i mituri 11 vjeçar ka kryer vetëvrasje për shkaqe personale dhe emocionale. Ngjarja nuk lidhej me ndonjë veprim të dhunshëm apo sjellje keqtrajtuese sistematike ndaj tij.

Veprimet e të miturit janë kushtëzuar nga gjendja emocionale dhe mosha e mitur e tij dhe duhet të kenë qenë të pamenduara por rrethana të momentit. Prokororia e Shkodrës mori vendim për kryerjen e ekspertimit Teknik kompjuterik të aparatit telefonik të fëmijës. Dyshohej se prej aty mund të zbulohej arsyeja e vërtetë që e shtyu 11-vjeçarin të kryente këtë akt ekstrem për jetën.

“Në këto kushte, me qëllim nxjerrjen e të dhënave në interes për hetimin, lind e domosdoshme hapja e aparatit telefonik dhe kryerja e ekspertimit teknik kompjuterik të aparatit telefonik për t’ju dhënë përgjigje pyetjeve:

– Të nxirren të dhëna nga rrjetet sociale Instagram, Tik Tok etj sic janë komunikime, foto e çdo informacioni mundur nga aparati telefonik objekt ekspertimi.

– Të nxirren komunikime whattsap, messenger etj nëse ka nga aparati telefonik objekt ekspertimi.

Top Channel