Një autobus me pasagjerë, i linjës Tiranë-Elbasan, ka marrë flakë gjatë kohës që ishte në lëvizje, në hyrjen perëndimore të qytetit të Elbasanit.
Deri më tani nuk raportohet për të lënduar, ndërsa zjarrfikësit kanë arritur të fikin zjarrin. Në dyshimet paraprake thuhet se shkak i zjarrit ka qenë një defekt në motorin e mjetit.
“Rreth orës 18:00, në aksin rrugor “Bradashesh-Elbasan”, dyshohet se për shkak të një defekti, ka rënë zjarr në pjesën e pasme të autobusit me drejtues shtetasin O. K., 28 vjeç, banues në Elbasan. Për pasojë janë shkaktuar vetëm dëme materiale”, thuhet në njoftimin e policisë.
Në pamjet e siguruara nga Top Channel shihet momenti kur pjesa e prapme e autobusit vijon të digjet. Zjarrfikësit po vijojnë punën në vendin e ngjarjes, për të shuare plotësisht flakët. Nga ana tjetër tymi është përhapur me shpejtësi në zonë.
Grupit hetimor po punon për dokumentimin ligjor të shkakut të rënies së zjarrit.
Top Channel
