![](https://top-channel.tv/wp-content/uploads/2024/09/0-2024-09-07T190138.257-800x450.jpg)
Të tjera detaje janë zbuluar nga aksioni i zhvilluar një ditë më parë në Itali ku u arrestuan 19 persona, 18 prej të cilëve shqiptar.
Sipas mediave italiane, ky rrjet kriminal drejtohej nga një familje shqiptare: Babai, nëna dhe djali. Të tre këta persona u arrestuan në Shqipëri. Ardian Korriku, 54 vjeç, djali i tij Jurgen Korriku, 27 vjeç dhe bashkëshortja Etleva Adami 46 vjeçe, organizonin të gjithë linjën e trafikut të drogës nga Holanda dhe Shqipëria në drejtim të Italisë, ku dhe më pas e shisnin.
Ata trafikonin kryesisht, kokainë, heroinë por dhe kanabis. Mediat italiane e përshkruajnë kryefamiljarin Ardian Korriku një sipërmarrës të vërtetë droge pasi kujdesej që të mos binte në syrin e autoriteteve. Hetimet për rastin nisën tre vite më parë, pas kapjes së një shqiptari dhe një gruaje italiane të cilët po transportonin me një makinë 2 kilogramë heroinë.
Pas zbërthimit të telefonatave, të dy të ndaluarve prokuroria italiane arriti të identifikonte dhe personat e tjerë të përfshirë në këtë veprimtari kriminale, duke prangosur më herët dhe 17 korrierë që bënin transportin e drogës. Ndërkohë numri i personave të vendosur nën hetim deri më tani, sipas mediave italiane është 65.
Top Channel