Inside Story/ Ofensiva e diplomatëve grek te komuniteti vlleh, u kërkojnë të deklarohen grekë

Në fakt, që në nisje të procesit, faktori politik që mbështet politikat greke ka qenë prezent me deklarata që janë konsideruar si trysni.

“Ka shumë raste kur regjistruesit në kundërshtim flagrant me ligjin, nuk e kryejnë shënimin në tableta por mbajnë shënime, me justifikimin se do i hedhin më vonë në tabletë. Apo dhe më keq, kemi raste të denoncuara në Tiranë, Korçë, Sarandë e gjetkë, ku nuk u drejtohen qytetareve pyetje në lidhje me përkatësinë etnike, gjuhën amtare dhe besimin fetar”- u shpreh Vangjel Dule, Kreu i PBDNJ-së

Kreu i PBDNJ Dule, vazhdimisht nga ngritur pretendime se regjistrimi i popullsisë nuk po zhvillohet sipas ligjit në zonat minoritare.

Por, asnjëherë nuk ka folur për presionet ndaj shqiptarëve që të deklarohen me etni greke. E gjithë beteja bëhet për të arritur shifrën 20 % shtetas të deklaruar grekë në njësitë si Himara dhe Konispoli. Kjo, do të pasonte me të drejta të zgjeruara për përdorimin e simboleve greke. Akoma më tej do të sillte krijimin e hapësirës kompakte minoritare në atë që grekët e njohin se Vorioepiri.

“Një njeri që jeton në Greqi dhe vjen për t’u regjistruar, nuk mund të regjistrohet si grek nëse nuk ka një vit që jeton në Himarë”- u shpreh gjuhëtari Rami Ramushi.

“Sot e shohim përqëndrimin vetëm në Himarë dhe Konispol. Pse? Sepse në Himarë dhe Konispol për shkak të ligjit që kemi mbi pakicat mund të arrihet shira artificiale prej 20%, pra njerëz që ndihen shqiptarë por deklarohen për një ditë të vetme grek kjo do të bënte që në këto zona të kishte tabela dygjuhëshe, të kishte greqishten gjuhë zyrtare dhe të kishte flamurin grek të ngritur në rrap të Konispolit dhe në shëtitoren e Himarës”- u shpreh studiuesi Ardit Bido.

Sipas informacioneve të shumta, diplomatë dhe zyrtarë grekë janë shpërndarë në terren në bashkitë Fier, Vlorë, Korçë dhe Delvinë ku kanë zhvilluar takime edhe me përfaqësues të komunitetit vlleh. Qëllimi mendohet të jetë deklarimi i tyre grekë, kundrejt përfitimeve që lidhen kryesisht me pajisjen e tyre me dokumente greke, duke ju mundësuar emigrimin në vendet e BE.

Në vitin 2012 Greqia zgjeroi hartat e saj duke njohur si pjesë të minoritetit grek disa fshatra ku historikisht kanë banuar ortodoksët shqiptarë. Në fakt, këtu fjala është për harta që nuk kanë asnjë vlerë pasi asnjë shtet nuk mund të ndërhyjë në punët e brendshme të një shteti tjetër.

Top Channel