Kosova dhe Serbia shkëmbyen akuza të forta në mbledhjen e Këshillit të Sigurimit të Kombeve të Bashkuara, ku u diskutua raporti për Kosovën i sekretarit të Përgjithshëm, Antonio Guterres.
Kryeministrja serbe Ana Bërnabic mohoi që Beogradi të ketë pasur gisht në ngjarjet e Banjskës dhe sulmin e 24 shtatorit e cilësoi si pasojë e veprimeve të vetë Prishtinës zyrtare.
“Strukturat serbe të sigurisë nuk kanë të bëjnë aspak me grupin e sulmuesve në fshatin Banjskë. Ngjarjet atje janë janë pasojë logjike e frikës dhe terrorit që ka ushtruar Prishtina pavarësisht thirrjeve për shtensionim”– Ana Bernabiç, kryeministre e Serbisë.
Por presidentja e Kosovës, Vjosa Osmani u tregua e prerë dhe e drejtpërdrejtë, duke deklaruar se Serbia dëshiron territor të Kosovës “por, nuk do ta marrë kurrë”.
“Ne duam paqe ndërsa Serbia e dëshmoi se kërkon luftë. Por, ne nuk do ta lejojmë të ndodhë kjo. Në 24 shtator, plani ishte destabilizimi i rajonit të Ballkanit Perëndimor dhe jo vetëm i Kosovës. Burimi kryesor i financimit, armatosjes dhe trajnimit të grupit të armatosur në Banjskë është Republika e Serbisë. Ajo që dëgjuam këtu nga Serbia ishte një përpjekje për minimizimin e aktit të agresionit ndaj Kosovës”– u shpreh Osmani.
Presidentja e Kosovës iu drejtua po ashtu me një mesazh serbëve që jetojnë në Kosovë, duke u thënë se Kosova është shtëpia e tyre.
“Konfirmoj se jemi të përkushtuar që të bëjmë më shumë për serbët në Kosovë. Por, ne nuk do t’i japim Serbisë instrumente përmes së cilave ata mund të shkatërrojnë jetën e serbëve që jetojnë në Kosovë dhe të vazhdojnë të tentojnë të shkatërrojnë sovranitetin dhe integritetin tonë territorial”– tha Osmani.
Ajo theksoi se Kosova nuk do të heqë dorë nga dialogu si mënyrë për të zgjidhur dallimet mes Serbinë.
Top Channel
