Më pak se një muaj para se të rikthehet në Shtëpinë e Bardhë, ja emrat e rinj të Trump për administratën 23/12 22:18
Autoritetet greke po vazhdojnë hetimet për ekzekutimin e gjashtë shtetasve turq në Lutsa.
Së fundmi është zbuluar mesazhi i fundit që kanë marrë viktimat në celular, 10 minuta para se të vriteshin. Në artikullin e medias turke Yeni Safak është zbuluar mesazhi që ata kanë marrë.
“Pozicioni juaj është zbuluar, dilni menjëherë nga shtëpia, do t’ju vrasin”, ishte mesazhi i fundit që ata kanë marrë. Sipas medias Yeni Safak, pasi kanë marrë këtë këtë mesazh, kanë vendosur të largohen nga shtëpia që kishin marrë me qira në Lutsa, duke mos ditur se disa kilometra më poshtë do t’u zënë pritë.
Ditën e djeshme media greke protothema.gr, tregoi se autoritetet greke kanë mbledhur telefonat e gjashtë viktimave, për të zbuluar se me kë kanë komunikuar para se të vriteshin dhe nëse dikush i kishte njoftuar se ishte vënë në shënjestër të një organizate kriminale rivale.
Gjithashtu po hetohet nëse dërguesi i mesazhit ka qenë 32-vjeçari turk i cili u arrestua vonë të hënën pasdite në aeroportin “Eleftherios Venizelos”, teksa po përgatitej të udhëtonte për në Mytilin, një orë pas ekzekutimit në Loutsa. Sipas mediave turke, 32-vjeçari quhet Süleyman D. dhe kishte pasaportë portugeze.
Media turke Yeni Safak zbuloi edhe të kaluarën kriminale të gjashtë të ekzekutuarve: 22-vjeçari Abdurrahman Tekru kishte rekord me 25 vepra penale dhe 16 urdhër-arreste, 23-vjeçari Burak Tahmaz 32 vepra penale dhe 6 urdhër-arreste, 24-vjeçari Ozan Kaan Tozlu 13 vepra penale dhe dy urdhër-arreste, 31-vjeçari Dorukhan Ersu Büyüktunç tre vepra penale dhe shtatë urdhër-arreste, 24-vjeçari Ömer Kanza 6 vepra dhe dy urdhër-arreste, ndërsa Barış Çağrı gjithashtu kishte një dosje pranë autoriteteve turke.
Sipas medias greke protothema.gr bëhet fjalë për shtetas turq, pesë prej të cilëve mbanin letërnjoftime false franceze, ndërsa i gjashti u identifikua me gjurmë gishtash. Të gjithë ata ishin anëtarë të një grupi kriminal, i cili vepronte jashtë vendit dhe jo në Greqi, sipas të dhënave të deritanishme.
Grupi kriminal ishte aktiv, sipas hetimeve të deritanishme, në vende të Bashkimit Evropian, por jo në Greqi. Gjithashtu, është zbuluar se në masakër janë përdorur 4 armë zjarri, dy prej të cilave janë të llojit pistoletë.
Automjeti me të cilin udhëtonin vjen nga Gjermania, me targa gjermane false dhe i përket një shtetasi rumun, i cili ia kishte dhënë viktimave. Hetimet po vijojnë me ritme të pandërprera dhe sistematike për identifikimin, gjetjen dhe kapjen e autorëve.
Top Channel
