Vuçiç takon Zelenskyn në Athinë, diskuton “për Kosovën dhe Metohinë”!

Sipas kreut të shtetit serb, ishte homologu ukrainas ai që kishte kërkuar privatisht një takim me të. Vuçiç sqaroi më pas se me Zelenskyn diskutuan për respektimin e integritetit territorial të Ukrainës, por edhe për situatën “në Kosovë dhe Metohi”.

“Patëm një bisedë të mirë e të hapur me Presidentin Volodymyr Zelenskiy mbi të gjitha çështjet e rëndësishme, si për Serbinë dhe Ukrainën, ashtu edhe për mbarë rajonin e botën. Ne diskutuam ngjarjet në Ukrainë dhe gjithashtu ato në Kosovë. Unë theksova edhe një herë se Serbia respekton integritetin territorial të Ukrainës, të cilin ne e kemi thënë qartë dhe pa mëdyshje që nga fillimi i konfliktit”, shprehet Vuçiç.

Kreu i shtetit serb shtoi më tej se Bashkimi Europian po përgatit një program rritjeje për vendet e Ballkanit Perëndimor për muajin tetor. Përveç stimujve për shumë gjëra të rëndësishme, ai e bëri të qartë se pret ndihma shtesë për vendet e Ballkanit Perëndimor.

Vuçiç e kundërshtoi ndërkohë një dispozite në Deklaratën përfundimtare, për të cilën u ra dakord gjatë darkës së shtruar nga Mitsotakis që kërkonte vendosjen e sanksioneve ndaj Rusisë, kështu që sipas mediave serbe, kjo dispozitë nuk u miratua as si pjesë e dokumentit të konfirmuar mbrëmë.

Vuçiç ka deklaruar më herët se Serbia po paguan “çmim të lartë” për mos vendosjen e sanksioneve ndaj Rusisë. Deputeti ukrainas , Oleksiy Gonarchenko reagoi ndërkohë për takimin Zelensky-Vuçiç duke thënë se nuk duhet të ketë kompromis mbi parimet e Ukrainës dhe se kjo e fundit duhet ta njohë shtetësinë e Kosovës, teksa insistoi të mos harrohet se Serbia është aleate e Rusisë.

Top Channel