Zjarret në Fier, neutralizohen vatrat në Peshtan dhe Kreshpan

Një grup vrojtimi do të jetë në gatishmëri gjatë natës për monitorimin e  situatës, dhe nesër në orën 07:00  do të jenë në zonën e përshkruar nga zjarri dy grupe me dy mjete zjarrfikëse të repartit të Fierit dhe 40 forca të ushtrisë për kontrollin e zonës së djegur.

Pasi zjarret shkrumbuan shkurret në anë të rrugës u zbuluan dhe disa arka me municione.

Për shuarjen e flakëve janë angazhuar 13 mjete, 3 zjarrfikëse dhe helikopteri Cougar.

Ministria e Mbrojtjes njofton se në fshatin Hekal, në Mallakastër situata është nën kontroll dhe po izolohet edhe vatra e fundit aktive. Po vijon operacioni për kapsulimin e vatrave në vendgrumbullimin e mbetjeve urbane, në Vlorë.

E vështirë është puna e forcave të emergjencave për shkak të terrenit në fshatin Buz, në bashkinë Memaliaj. Por përhapja e zjarrit është e dobët, pasi zjarri ndodhet mes dy zallishteve.

Është arritur të izolohet plotësisht zjarri në malin e Gjallicës në njësinë administrative Shtiqen, në Kukës. Po ashtu janë vënë tërësisht nën kontroll flakët dhe vatrat në fshatin Mandaj, në njësinë administrative Helmas në Kavajë.

Top Channel