Një turist çek ka mbetur i dëmtuar pasi ra nga lartësia në një zonë me terren të vështirë, në Krrabë.
Nga të dhënat paraprake bëhet me dije se 61-vjeçari me inicialet V.SH. u dëmtua gjatë eksplorimit të natyrës, në vendin e quajtur “Syri i Ciklopit”.
Shërbimet e Komisariatit të Policisë Nr. 1, në bashkëpunim me Fnsh Tiranë, pas marrjes së njoftimit, menjëherë kanë organizuar punën për t’i ardhur në ndihmë 61-vjeçarit.
Falë ndërhyrjes së shërbimeve të Policisë dhe shërbimit mjekësor është bërë e mundur nxjerrja e shtetasit të dëmtuar, dhe dhënia e ndihmës së parë. Për shkak të terrenit mjaft të vështirë, turisti çek është transportuar me barrelë deri në rrugën e makinave.
“Policia e Tiranës është e angazhuar maksimalisht në shërbim të qytetarëve dhe vizitorëve, dhe i fton ata që për çdo problematikë që mund të hasin, të telefonojnë në numrin pa pagesë 112″– thuhet në njoftim.
Top Channel
