Një 55-vjeçare nga Korça ka shkuar në spital me frakturë në këmbë ndërsa akuzon bashkëshortin se e ka dhunuar disa ditë më parë dhe më pas e ka privuar nga marrja e shërbimit mjekësor.
Sipas 55-vjeçares Diana Mulla, ngjarja ka ndodhur 6 ditë më parë në banesë, ku bashkëshorti i Dianës, Fatos Mulla, e ka shtyrë në shkallët e shtëpisë private, duke i shkaktuar thyerje të këmbës së djathtë.
Mësohet se ai e ka mbajtur në banesë deri ditën e djeshme, e më pas e ka çuar në spital, aty ku e dhunuara ka treguar për bluzat e bardha se bashkëshorti e ka shtyrë. 55-vjeçarja ka probleme shëndetësore, ku ka pësuar paralizë dhe vuan nga zemra, pra konsiderohet si person invalid.
Denoncimi u bë sot prej saj në uniformat blu, ndërsa bashkëshorti Fatos Mulla u shoqërua në komisariat për të dhënë deklaratën e tij. Shkak për shtyrjen është një motiv banal, grindje për një gotë vaji siç thuhet nga ana e të dhunuarës. Përgjatë këtyre ditëve, bashkëshorti nuk e ka lejuar të kontaktojë më familjarët e saj ndërsa bëhet me dije se vajza e vetme e çiftit jeton prej vitesh në Itali.
Top Channel
