Mblidhet Forumi i Shoqërisë Civile dhe Think Tank 2023

Forumi organizohet si pjesë e Samitit Vjetor të Procesit të Berlinit i cili për herë të parë organizohet në një vend të Ballkanit Perëndimor dhe këtë vit do të organizohet nga Qeveria e Shqipërisë, si mbajtës aktual i Presidencës së Procesit të Berlinit.

Forumi i Shoqërisë Civile dhe Think Tank 2023 është një nismë e rëndësishme që synon të krijojë një platformë për dialog konstruktiv dhe gjithëpërfshirës midis përfaqësuesve të shoqërisë civile, grupeve të ekspertëve dhe përfaqësuesve të Qeverive nga Ballkani Perëndimor. Duke ndarë praktikat më të mira dhe duke zhvilluar rekomandime për politikat, Forumi do të nxisë bashkëpunimin rajonal, reformat në lidhje me BE-në dhe të mbështesë procesin e pranimit të vendeve në Ballkanin Perëndimor.

Aktiviteti shërbeu si një moment kyç për të nisur Forumin duke sjellë së bashku përfaqësues të shoqërisë civile dhe ekspertë nga të gjashtë vendet e Ballkanit Perëndimor dhe BE-së por edhe më gjerë nga vendet e Bashkimit Evropian si Greqia, Gjermania, Italia, Austria, Polonia dhe më gjerë.

Temat kryesore si energjia, qasja në tregun e përbashkët evropian, dixhitalizimi dhe lidhja, klima dhe axhenda e gjelbër, lëvizshmëria dhe migrimi, siguria dhe gjeopolitika dhe politika e zgjerimit do të jenë në fokus të punës së Grupeve të Punës përgjatë vitit 2023. Këto grupe do të formulojnë së bashku rekomandime specifike për politikat qeveritare, pas organizimit të një procesi të gjerë konsultimi dhe advokimi në vendet e Ballkanit Perëndimor dhe atyre të Bashkimit Evropian. Më pas rezultatet do të prezantohen dhe diskutohen me zyrtarë qeveritarë nga Ballkani Perëndimor dhe vende të tjera evropiane përpara dhe gjatë Samitit të Procesit të Berlinit që do të organizohet në Tiranë më 16 tetor 2023.

Përgjatë aktivitetit përshëndetën me fjalën e tyre Peter Zingraf, Ambasador, Ambasada e Republikës Federale të Gjermanisë,  Luigi Mattirolo, Zëvendës Ambasador, Ambasada e Republikës së Italisë; Odeta Barbullushi, Këshilltar i Kryeministrit të Shqipërisë për Ballkanin Perëndimor dhe Çështjet e BE-së dhe Andi Dobrushi, Drejtor i Ballkanit Perëndimor për Fondacionet e Shoqërisë së Hapur.

Peter Zingraf: Kohët kanë ndryshuar shumë që prej fillimeve të Procesit të Berlinit, por unë akoma mendoj se po të mos e kishim, do të na duhej ta shpiknim. Ose të shpiknim diçka të ngjashme, ndoshta një lloj Procesi Ballkanik.

Luigi Mattirolo: Prej një viti e gjysmë më parë, bota ka ndryshuar me pushtimin e Ukrainës nga Rusia. Çfarë ka qenë më përpara një prioritet dhe objektiv për Italinë, integrimi i Ballkanit Perëndimor në BE, tani është kthyer në një imperativ dhe prioritet strategjik.

Andi Dobrushi: Konteksti na tregon se ka sinjale të rëndësishme nga Berlini dhe Brukseli, që tregojnë se ka një momentum të ri për procesin e zgjerimit, nga i cili ne duhet të përfitojmë. Kështu që ne jemi këtu për të inkurajuar qeveritë tona në Ballkanin Perëndimor që të ruajnë përkushtimin për agjendën e reformave, dhe të mos e humbasin mundësinë që vjen nga optimizmi i rigjallëruar për procesin e integrimit.

Procesi i Berlinit, nga fillimi i tij më 28 gusht 2014, ka nisur një udhëtim transformues, duke synuar të ringjallë flakën e shpresës dhe përparimit brenda Ballkanit Perëndimor drejt integrimit evropian.

Në prag të 10-vjetorit të Procesit të Berlinit, për herë të parë, në një vend të Ballkanit Perëndimor siç është Shqipëria, do të zhvillohet në 16 Tetor 2023 Samiti i Liderëve të Procesit të Berlinit i organizuar nga Qeveria Shqiptare.

Top Channel