Donald Trump zgjedh financierin Scott Bessent për Sekretar të Thesarit, homoseksuali i parë që do të mbajë këtë post 23/11 07:47
Anëtarë të komisionit të parë publik të hetimit të reagimit ndaj Covid-19 në Britani kanë nxitur sot qeverinë të thotë të vërtetën pas tentatives se ndalimit të publikimit të dokumentacionit.
“Nëse nuk do të arrijmë te e vërteta, nuk do të kemi rekomandimet si të shpëtojmë jetë dhe gjithçka do të ketë shkuar dëm”, tha Elkan Abrahamson, avokati përfaqësues i familjarëve të viktimave të Covid-19.
Qeveria britanike tha javës që shkoi se do të sfidojë ligjërisht publikimin e dokumenteve të hetimit për trajtimin prej saj të pandemisë Covid.
Zyrtarët qeveritarë kanë njoftuar se po kërkojnë një rivlerësim gjyqësor të urdhrit të gjykatëses Heather Hallett për dorëzimin e të gjithë korrespondencës.
Në veçanti ata kundërshtojnë publikimin e mesazheve të paredaktuara në rrjetin WhatsApp, dhe të shënimeve të ish-kryeministrit Boris Johnson.
Johnson është kritikuar gjatë kohës së emergjencës shëndetësore për reagim neglizhent ndaj numrit të madh të të vdekurve.
Ministrat akuzohen gjithashtu se kanë dhënë kontrata të furnizimit me pajisje mbrojtëse e kurimit të Covid për miq e klientë të tyre, duke shkelur udhëzimet e qeverisë.
Në një letër për gjykatësen Hallett thuhet: “Kabineti qeveritar kërkon një rivlerësim gjyqësor”.
“Ne e bëjmë këtë me keqardhje dhe me sigurinë e bashkëpunimit të plotë me hetimin sipas juridiksionit të gjykatave”.
Në letër shtohet se nëse fitohet rivlerësimi, do të shqyrtojë “ndalimin e publikimit të mesazheve e dokumenteve që nuk kanë lidhje me çështjen në hetim, siç janë komunikimet personale të anëtarëve të qeverisë”.
Por Hallett thotë se është detyra e saj të vendosë për hetimet dhe akuzon qeverinë se po përpiqet të mbulojë faktet./AFP/
Top Channel
