14 Maji, po rezulton dite historike për Partine Socialiste të Shkodrës, pasi si asnjëherë më parë ka marrë masivisht votat e qytetareve të këtij qyteti, të cilët që prej vitit 1992 votonin vetëm të djathtën.
Shkodranët, këtë here jo vetëm që kanë zgjedhur Benet Becin si kryebashkiakun e ardhshëm por me 18 mijë votat e tyre edhe për Këshillin Bashkiak, kanë konfirmuar se nuk kanë votuar vetëm individin por i kanë besuar Partisë Socialiste për drejtimin e Shkodrës në 4 vitet e ardhshme.
Kështu, PS ka fituar 18 mandate për Këshillin Bashkiak ndërsa koalicioni “Bashkë Fitojmë” vetëm 13 të tilla, duke e kthyer për herë të parë Sali Berishën në opozitar në Shkodër. Partia Social Demokrate e Tom Doshit, garoi deri në 3 kutitë e fundit për të nxjerrë Berishën dhe Metën, si forcë e tretë në Shkodër por për 269 vota nuk ia arriti, duke marrë vetëm 12 mandate.
Ndërkohe Partia Demokratike e Alibeajt, siguroi 5 këshilltarë bashkiak ndërsa 3 parti të vogla fituan nga një të tillë. Me 18 votat e këshilltarëve socialist dhe 12 të PSD, Benet Beci, do të jetë fuqiplotë në krye të bashkisë.
Në zgjedhjet e 14 Majit, në rang qarku, partia e Tom Doshit mund të konsiderohet më e suksesshmja pasi ka rritjen më të madhe të votave.
Në Shkodër, brenda 4 viteve nga 9 shkoi në 12 këshilltarë ndërsa në Puke dhe në Fushë-Arrëz ku socialistët humbën garën për kryetar, PSD u shpall forcë e parë për Këshillin Bashkiak duke marrë numrin më të madh të votave.
Në Vaun e Dejës, teksa vazhdon numërimi PSD, është e para në Këshillin Bashkiak me 11 mandate. Në Malësinë e Madhe, ka nisur me vonesë numërimi i votave të qytetareve por nga kutitë e para, për këshillin kryesojnë socialistët ndërsa e dyta renditet partia e Tom Doshit. Në zgjedhjet e fundit, parlamentare, ai siguroi 2 mandate deputetësh në qarkun e Shkodrës.
Top Channel
