Serë me drogë në Krujë/ Asgjësohen 520 fidanë kanabis, autorët në kërkim 

Policia me anë të dronëve ka gjetur serën e improvizuar në një zonë të pyllëzuar të fshatit Brret, Krujë, me rreth 520 fidanë narkotikë kanabisi, të gatshëm për t’u mbjellë në tokë, me qëllim kultivimin.

Ndërsa fidanët u asgjësuan me anë të djegies, policia bën të ditur se vijojnë hetimet për identifikimin dhe kapjen e autorit/ëve të kësaj veprimtarie kriminale, për veprën penale “Kultivimi i bimëve narkotike”.

Kontrollet gjithashtu vijojnë në të gjithë territorin.

Sipas policisë, materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme.

“Krujë/ Skuadra policore të pajisura me dronë, vijojnë kontrollet në zonat e pyllëzuara të rrethit të Krujës, në kuadër të operacionit policor antikanabis i koduar “Territor i pastër”, kundër kultivimit të bimëve narkotike. Kontrollet, me pjesëmarrjen e shërbimeve të Komisariatit të Policisë Krujë dhe Forcës së Posaçme Operacionale të DVP Durrës. Zbulohet një serë me rreth 520 fidanë narkotikë kanabisi, të gatshëm për t’u mbjellë në tokë, me qëllim kultivimin.
Si rezultat i kontrolleve intensive, në të gjithë territorin e rrethit Krujë, në zbatim të planit operacional policor antikanabis, të koduar “Territor i pastër”, të hartuar nga Drejtoria e Përgjithshme e Policisë së Shtetit, me qëllim parandalimin dhe goditjen e tentativave që në fazë fillestare, të kultivimit të bimëve narkotike, është konstatuar dhe goditur një tjetër rast i kësaj veprimtarie kriminale.
Skuadrat policore, të ngritura në kuadër të këtij plani operacional, zbuluan në një territor të fshatit Brret, Krujë, një serë të improvizuar, brenda së cilës u gjetën rreth 520 fidanë të dyshuar narkotikë kanabisi, të gatshëm për t’u mbjellë në tokë, me qëllim kultivimin e tyre. Fidanët e dyshuar narkotikë u asgjësuan me anë të djegies.
Ndërkohë, Komisariati i Policisë Krujë dhe Drejtoria Vendore e Policisë Durrës, në bashkëpunim me Prokurorinë pranë Gjykatës së Rrethit Gjyqësor Krujë, vijojnë hetimet për identifikimin dhe kapjen e autorit/ëve të kësaj veprimtarie kriminale. Kontrollet vijojnë në të gjithë territorin e rrethit. Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme, për veprën penale “Kultivimi i bimëve narkotike””, sipas njoftimit të policisë.

Top Channel