Premtimi për të rimarrë Kanalin e Panamasë, presidenti i shtetit amerikano-qendror i përgjigjet Trumpit: Do vazhdojë të jetë e… 20/01 22:43
Eshtrat e liderit fashist spanjoll José Antonio Primo de Rivera janë zhvarrosur dhe janë zhvendosur në një varrezë më pak të shquar në Madrid.
Kjo masë është pjesë e një përpjekjeje të qeverisë për të trajtuar trashëgiminë e luftës civile dhe diktaturës në vend.
Primo de Rivera u ekzekutua në fillim të konfliktit 1936-1939, për lidhjet e tij me rebelët që kishin kryer një grusht shteti kundër qeverisë së zgjedhur.
Mbështetësit e tij të ditëve moderne u përleshën me policinë jashtë varrezave.
“Zhvarrosja e Primo de Rivera është një lajm i mirë për demokracinë,” shkroi në Twitter Ione Belarra, ministre e të drejtave sociale në qeverinë e koalicionit të majtë të Spanjës.
“Fashistët duhet të nxirren nga mauzoleumet dhe nga rrugët”, shtoi ajo.
Trupi i Primo de Rivera u varros në katër vende të tjera, përpara se të zhvendosej në 1959 në Luginën e Cuelgamuros, një mauzoleum i madh në malet në veri të Madridit. Struktura u ndërtua nga diktatori Gjeneral Francisco Franco, i cili gjithashtu u varros atje pas vdekjes së tij në 1975. Të dy ata u varrosën pranë altarit kryesor të bazilikës së monumentit. Pas një beteje ligjore, Franko u zhvarros në vitin 2019 nga qeveria e atëhershme socialiste.
Zhvarrosja e Primo de Rivera vjen pas miratimit të vitit të kaluar të ligjit të qeverisë për Kujtesën Demokratike, i cili kërkon të heqë simbolet frankoiste nga hapësirat publike dhe të sigurojë që figurat e lidhura me regjimin të mos glorifikohen.
Ligji thotë në mënyrë specifike se asnjë individ nuk duhet të mbetet i varrosur në një “pozicion të spikatur” në vendin e Cuelgamuros.
Zhvarrosja, e cila u bë në 120-vjetorin e lindjes së Primo de Rivera, filloi herët në mëngjes të hënën dhe u krye pa mbulim mediatik.
Top Channel
