Avioni përplaset me disa kamionë teksa zbriste në pistë, tre të plagosur 17/11 22:57
Rreth 50 aktivistë të klimës janë arrestuar në shtetin australian të Uellsit të Ri Jugor pasi protestuesit u ngjitën në një tren që transportonte qymyr dhe filluan të nxjerrin me lopatë ngarkesën e tij nga vagonët.
Treni u ndal pranë Newcastle, një terminal kryesor i eksportit të qymyrit.
Grupi protestues Rising Tide tha se po kërkonte anulimin e të gjitha projekteve të reja të qymyrit.
Australia është eksportuesi më i madh i qymyrit në botë dhe ndryshimi i klimës është një çështje jashtëzakonisht përçarëse atje.
Bota tashmë është ngrohur me rreth 1.1C që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha të emetimeve.
Grupi postoi një imazh në Twitter që tregonte protestuesit në dhe rreth trenit të ndalur.
“Ne kemi ndalur qymyrin në portin më të madh të qymyrit në botë, duke kërkuar që PPSH (Partia e Punës Australiane në pushtet) t’i kushtojë vëmendje paralajmërimeve të OKB-së dhe të anulojë menjëherë të gjitha projektet e reja të qymyrit,” thuhet në Twitter.
Rising Tide tha në një deklaratë se 20 nga grupi ishin ngjitur në tren për të shkarkuar qymyrin me lopata, ndërsa 30 të tjerë dhanë mbështetje.
Policia tha se 47 aktivistë u akuzuan për “shkelje të korridorit hekurudhor” dhe u liruan pasi u dhanë njoftime për pjesëmarrje në gjykatë.
Newcastle përshkruhet si terminali më i madh i eksportit të qymyrit në botë dhe porti më i madh i transportit me shumicë në bregun lindor të Australisë.
Qeveria laburiste e Australisë është zotuar të ulë emetimet e karbonit në vend me 43% deri në vitin 2030, por nuk ka përjashtuar projektet e reja të karburanteve fosile. Ajo sheh një skemë të tregtimit të emetimeve të karbonit të njohur si “mekanizmi mbrojtës” si mjetin kryesor për të arritur objektivin e saj.
Top Channel
