Nuk sanksionoi Rusinë, Serbia ‘show’ me ndihmat për Ukrainën! Dërgon pajisje për riparimin e sistemit elektrik: Do të jetë më ngrohtë falë nesh!

30/03/2023 12:57

Krahas lojës me “dy porta”, duke mbështetur plotësisht integritetin territorial të Ukrainës por hezituar të dënojë agresionin rus përmes sanksionimit të Rusisë, Serbia e Aleksandër Vuçiç ka gjetur një tjetër metodë për të dhënë show në arenën ndërkombëtare: dërgimin e ndihmave në Ukrainë me qëllim mbështetjen e sistemit të saj elektrik.

Lajmi është konfirmuar nga ambasada Amerikane në Beograd. Përmes një mesazhi në faqen zyrtare, Ambasada amerikane në Serbi u shpreh krenare me vendimin e Beogradit për dërgimin e ndihmave në Ukrainë, duke theksuar se të jesh partner do të thotë të ndihmosh kur të nevojitet.

“Ne jemi krenarë për Serbinë si i vetmi vend në rajon që dërgoi ndihma për rindërtimin e sistemit elektroenergjetik të Ukrainës. Me donacionin prej tre milionë eurosh, ambulanca dhe një vend të sigurt për shërimin e fëmijëve ukrainas, Serbia vazhdon me ndihma, duke shprehur solidaritetin me popullsinë e Ukrainës. Falë bujarisë suaj, do të ketë ngrohtësi dhe dritë atje ku deri më tani kishte të ftohtë dhe errësirë”, thuhet në Twitterin e ambasadës.

Me vendim të Qeverisë së Serbisë, të mërkurën katër kamionë me pajisje të lidhura me sistemin elektrik janë dërguar në Rumani në Qendrën e BE-së për grumbullimin e ndihmave për Ukrainën, prej nga do të përcillen në destinacion.

Top Channel