Kryeministri i Kosovës, Albin Kurti dhe presidenti i Serbisë, Aleksandër Vuçiç, të hënën në Bruksel, do të kenë para planin evropian, i njohur si franko-gjerman, për normalizimin e marrëdhënieve në mes dy vendeve.
Ndërmjetësit e këtij takimi presin që palët të pranojnë këtë propozim dhe aty të diskutohet për afatet e zbatimit të tij. Njohës të zhvillimeve politike vlerësojnë që mospranimi i këtij propozimi do kishte pasoja, ndërsa nga opozita kritikojnë Kurtin për mostransparencë lidhur me këtë çështje.
Takimin e fundit e kanë zhvilluan në nëntor të vitit të kaluar, ku është diskutuar për çështjen e targave ilegale në veri të Kosovës. Ndërsa, më 27 shkurt temë në Bruksel, do të jetë plani evropian për marrëdhëniet e mëtejme në mes të Kosovës dhe Serbisë.
Kryeministri Albin Kurti edhe njëherë ka përsëritur se ky plan paraqet bazën e mirë për diskutime të mëtejmë. Megjithatë, nuk ka dhënë detaje se çka pret të diskutohet në këtë takim.
Deputetja nga radhët e Partisë Demokratike të Kosovës, Ariana Musliu-Shoshi, thotë për KosovaPress se kryeministri Kurti e ka lënë në terr informativ opozitën sa i përket takimit që pritet të mbahet të hënë në kryeqendrën evropiane.
“Si Parti Demokratike, si deputetë të opozitës vazhdojmë të jemi në një terr informativ, ju e shihni në seanca të Kuvendit krejt çka ofron z.Kurti si kryeministër, i cili do të duhej të ishte transparent, sepse vet ka thirre në transparencë sa ishte kryeopozitar, ne kemi një kryeministër, i cili vjen dhe vetëm bën lojëra fjalësh, mirëpo asnjëherë nuk jep atë konkrete se çfarë ne kërkojmë nga ai në këtë proces… I bëra pyetje parlamentare ku kërkova të dijë se cilat janë temat që do i diskutojë pikërisht të hënën dhe nga kryeministri nuk e mora as edhe një fjalë të vetme sa i përket këtij procesi konkretisht sa i përket këtij takimi të datës 27 shkurt”, thotë deputetja e PDK-së.
Për mostransparencë rreth procesit të dialogut kritika për Kurtin kanë nga Lidhja Demokratike e Kosovës. Deputetja Rrezarta Krasniqi thotë se do të duhej të mbahej debat parlamentar para se Kurti të udhëtojë për takim në Bruksel.
“Ka munguar transparenca sa i përket këtij procesi, ne ende nuk e kemi parë planin franko-gjerman, e kemi dëgjuar kryeministrin që ka thënë që do të ketë një njohje bazë dhe nuk do të ketë njohje përfundimtare, ndërsa ne si parti opozitare, si Lidhje Demokratike e Kosovës e kemi përkrahur kryeministrin në procese integruese, mirëpo që procesi integrues i dialogut të përfundojë me njohje reciproke në mes të dy vendeve që të mos zgjatet ky proces tutje”, thotë deputetja Rrezarta Krasniqi.
Në seancën e së enjtes në Kuvendin e Kosovës, Kurti ka thënë se e ka pranuar parimin e kërkuar nga ndërmjetësit evropian në dialog që sipas tij, është transparenca e procesit dhe konfidencialiteti i bisedimeve.
“Rrjedhimisht përmbajtjen tekstuale e kam ndarë me kryetarët e partive opozitare por jo edhe në Kuvend të republikës, ndonëse besoj që pas shumë muajve pothuajse asgjë nuk ka ngelur e panjohur nga ai propozim që paraqet bazën e mirë për diskutime të mëtutjeshme që fillojnë të hënën qe vjen”, ka thënë Kurti.
Nga takimi i 27 shkurtit në Bruksel, profesori i shkencave politike, Dritëro Arifi pret që të pranohet propozimi evropian, derisa shton se kundërshtimi i tij do të prodhonte pasoja të rënda për palën penguese.
“Pritet që një farë mënyre të pranohet ajo marrëveshja plani franko-gjerman respektivisht evropian, sepse Qeveria e Kosovës ka vlerësuar që ndoshta është alternativa më e mirë për momentin që është ofruar, sepse plani franko-gjerman është plan i përkohshëm, megjithatë evropianët nuk po e quajnë të tillë por është i përkohshëm, sepse ai e ka vetëm njohjen de-facto dhe jonjohjen ligjore të obligueshme, por si pikënisje po themi si normalizim i raporteve në mes të dy vendeve mund të themi që është një plan solid, i cili po besoj që të dyja palët do ta nënshkruajnë sepse mospranim i këtij plani do të ketë pasoja shumë të rënda për cilëndo palë që mund të potencohet si palë penguese”, thotë Arifi.
Ditë më parë i dërguari i Bashkimit Evropian për dialogun Kosovë-Serbi, Miroslav Lajçak ka thënë se pret që më 27 shkurt Kosova dhe Serbia të pranojnë publikisht propozimin evropian për normalizimin e raporteve.
Ai ka theksuar se në këtë takim do të diskutohet edhe për zbatimin e atij plani.
Ndërsa, nga Shtetet e Bashkuara të Amerikës kanë thënë që presin nga udhëheqësit t’i qasen takimit me frymë konstruktive të nevojshme për të ecur përpara. Propozimi i njohur si franko-gjerman, u është dorëzuar palëve vitin e kaluar, i njëjti nuk është publik, por që kryeministri Kurti e ka konsideruar bazë të mirë për negociata./KosovaPress
Top Channel
