Asociacioni/ Escobar flet hapur: Po s’e bëri Kurti, do “e bëjmë ne”!

Në një intervistë për programin në gjuhën serbe të Zërit të Amerikës, pas takimeve në Prishtinë dhe në Beograd, i dërguari i posaçëm amerikan për Ballkanin Perëndimor Gabriel Escobar e artikuloi hapur kërkesën e bashkësisë ndërkombëtare që Kosova të përmbushë detyrimin ligjor për themelimin e Asociacionit të komunave me shumicë serbe, edhe pse siç nënvizoi ai, kjo çështje dhe propozimi franko-gjerman “nuk janë plotësisht të lidhura” me njera tjetrën.

Sipas Escobarit, fakti që Serbia nuk i ka vënë sanksione Moskës për agresionin në Ukrainë e ka dëmtuar shumë imazhin e saj.

“Sfida është se dialogu u shndërrua në instrument të menaxhimit të krizave. Ne duam ta vëmë në nivelin strategjik dhe mendojmë se propozimi franko-gjerman është i mirë. Shtetet e Bashkuara e mbështesin plotësisht propozimin dhe qëndrimi ynë është se duam ta bëjmë të funksionojë për të dyja vendet. Më fjalë të tjera, duam që ai të funksionojë në atë mënyrë që të hapë ardhmërinë europiane për të dyja vendet, të hapë mundësitë për bashkëpunim më të gjerë jo vetëm me Evropën, por rajonin dhe Shtetet e Bashkuara në përgjithësi”, tha Escobar.

Kryeministri Albin Kurti duket i vendosur të mos e zbatojë marrëveshjen për Asociacionin, por Escobar thekson se një person dhe një palë nuk mund të shmangë një detyrim ligjor ndërkombëtar.

“Ky është fakt. Ne do ta bëjmë këtë dhe unë do ta bëj këtë duke gjetur partnerë dhe ka shumë partnerë, ka shumë njerëz, që duan të shohin marrëdhënie më të mira të serbëve në veri dhe pjesës tjetër të vendit”, shtoi Escobar.

Nëse Kurti nuk e bën këtë gjë, shtoi zyrtari i lartë amerikan, atëherë do të fillojmë bisedimet në shkallë vendi për atë se çfarë nënkupton ky detyrim për qytetarët e Kosovës. “Kurti nuk ka nevojë të pajtohet me këtë gjë, sepse më të është pajtuar Kosova”, ishte komenti i prere i tij.

Top Channel