Edhe në Gjykatën e Lartë janë në kontrast total i pandehuri i akuzuar që ka vrarë Pjerin Xhuvani dhe vajza e viktimës.
Mbi hipotezën e transferimit nga Elbasani në Tiranë të procesit për atë vrasje, avokate Rezarta Tahiraj që përfaqëson familjarët e viktimës në rolin e palës civile ka dërguar në Gjykatën e Lartë një dokumentacion të gjerë që kundërshton, pikë për pikë, të gjitha motivet që i pandehuri Arbër Paplekaj ka shkruar, nëpërmjet avokatit të tij, në kërkesën e transferimit të procesit nga Elbasani që është qyteti ku në 21 prill 2021 u vra me katër goditje pistolete doktori psikiatër Pjerin Xhuvani.
“Pozicioni ynë – deklaroi avokate Tahiraj – është në kundërshtim total me kërkesën e transferimit të këtij procesi dhe kërkesat e tyre i vlerësojmë absolutisht të pabazuara në prova, përveçse të paarsyeshme dhe disa do të mund të rezultojnë madje në kundërshtim me ligjin”.
Duke iu referuar në veçanti hipotezës së kursimit ekonomik për Shtetin në rast se i pandehuri nuk do të ishte i detyruar të shkonte në Elbasan por të qëndronte në Tiranë për procesin, avokate Tahiraj ka shpjeguar në aktet e depozituara në Gjykatën e Lartë se kursimi i vërtetë për Shtetin dhe për të gjitha të pandehurit e tjerë është duke lënë të pandryshuar selinë procedurale, pra procesin – për avokaten e Palës civile – është shumë e logjikshme dhe e dobishme, edhe për Shtetin, që të qëndrojë në Elbasan.
Avokate Tahiraj në Gjykatën e Lartë ka shpjeguar edhe të gjitha motivet e tjera që çojnë në justifikimin e refuzimit të kërkesës të transferimit të këtij procesi në referim, edhe me hipotezat e rrezikut për të akuzuarin e vrasjes.
Top Channel
