Xi Jinping siguron mandatin e tretë në Kinë/ Zgjeron fuqitë dhe shpërblen aleatët

23/10/2022 10:47

Xi Jinping është konfirmuar si lider i Kinës për një mandat të tretë, pasi një takim politik njëjavor eliminoi rivalët kryesorë dhe forcoi fuqinë e tij politike.

Kongresi i 20-të i Partisë, takimi më i rëndësishëm i ciklit politik pesëvjeçar të Partisë Komuniste Kineze në pushtet, mblodhi 2,400 delegatë në Pekin për të vulosur riorganizimet e mëdha dhe ndryshimet kushtetuese përpara mbylljes së tij zyrtare të shtunën.

Shtatë politikanët besnikë kryesorë të Xi u zbuluan si anëtarë të organit më të fuqishëm politik të Kinës, komitetit të përhershëm të Byrosë Politike (PSC), teksa ecnin në skenë sipas renditjes.

Analistët thonë se Xi vlerëson besnikërinë dhe besueshmërinë mbi të gjitha, prandaj edhe zgjedhjet ishin mëse të mirëmenduara.

Për herë të parë në 25 vjet, Byroja e re Politike nuk përmban asnjë anëtare grua ku më parë kishte një, zëvendëskryeministren Sun Chunlan, dhe është reduktuar në 24 nga 25.

Në fjalimin e tij të shkurtër të dielën, Xi tha se Kina duhet të qëndrojë në gatishmëri të lartë për sfidat “si një student që ulet për një provim që nuk ka fund”, duke përsëritur paralajmërimet e mëparshme për “ujëra të trazuar” dhe “stuhi të rrezikshme” në horizont.

Retorika e ashpër e Xi është rritur në krahasim me kongreset e mëparshme, të cilat ishin më të përqendruara në paqen dhe zhvillimin, dhe pasqyrojnë se sa më e izoluar është bërë Kina nga perëndimi, me mosmarrëveshje dhe tensione të shumta.

Ndryshime u panë edhe në qëndrimin më agresiv të Pekinit ndaj Tajvanit , ku Xi nuk përjashtoi përdorimin e forcës për të marrë nën kontroll ishullin e vetëqeverisur.

Top Channel