Mbi 40 të vrarë nga sulmet pakistaneze në Afganistan, në mesin e viktimave më shumë gra dhe fëmijë 25/12 14:03
Prindërit e një vajze franceze të shkollës fillore, e cila u gjet në një valixhe e vrarë dhe e përdhunuar, kanë nxitur politikanët e vendit të ndalojnë shfrytëzimin e fenomenit të rëndë për qëllimet e tyre.
Prindërit në zi u takuan me presidentin Macron kësaj jave dhe u lutën që politika të mos shfrytëzojë vdekjen e bijës së tyre, pasi një foto e fëmijës ishte parë në një miting politik në Paris të enjten.
Policia ka thënë se për ngjarjen është arrestuar një grua e pastrehë dhe me probleme të shëndetit mendor nga Algjeria, por fenomeni i rëndë është i gjere dhe i përhapur në Evropën Perëndimore ndersa autorët e këtyre akteve anti-njerëzore rrallëherë kanë dalë para drejtësisë.
Në mitingun në fjalë partitë të së djathtës ekstreme akuzonin presidentin Macron si përgjegjës të rrëmbimit, përdhunimit dhe vrasjes së 12 vjeçares, me mosveprimin e tij.
Prindërit e të miturës së ndjerë që tashmë njihet vetëm si ‘Lola’ thanë: “Çdo përdorim i emrit apo imazhit të fëmijës për qëllime politike, duhet të hiqet nga protestat dhe interneti”.
Në komentet e tij për vrasjen e përdhunimin e fëmijës, Macron tha se ngjarja e tmerrshme ka tronditur vendin.
“Përballemi me ligësi ekstreme teksa kuptojmë që këto mund të ndodhin në shoqërinë tonë,” tha ai për gazetarët në një samit të BE.
“Mendojmë për prindërit e Lola-s për vëllanë e gjysmë-vëllanë e saj, tronditjen e kësaj familjeje që ruan dinjitetin dhe unitetin në këto momente të vështira”, shtoi Macron.
Trupi i copëtuar i Lola u gjet në një valixhe jo shumë larg ndërtesës ku banonte me prindërit, në zonën ’19 arrondissement’ në Paris.
Ajo u shpall e humbur kur nuk u kthye në shtëpi nga shkolla, që është pranë zonës.
Lola do të varroset të hënën në qytetin verior Lillers.
Top Channel
